പൊലീസ് ഉദ്യോഗസ്ഥരുടെ പരാതികളിൽ പരിഹാരം: ഓൺലൈൻ അദാലത്ത് തീയതി നിശ്ചയിച്ചതായി ഡിജിപി

തിരുവനന്തപുരം: പൊലീസ് ഉദ്യോഗസ്ഥരുടെ പരാതികളിൽ പരിഹാരം കാണുന്നതിനുള്ള സംസ്ഥാന പൊലീസ് മേധാവിയുടെ ഓൺലൈൻ അദാലത്ത് സെപ്റ്റംബർ 9, 16, 23 തീയതികളിൽ നടക്കുമെന്ന് ഡിജിപി അനിൽകാന്ത് അറിയിച്ചു. ഇടുക്കി, കണ്ണൂർ സിറ്റി, കണ്ണൂർ റൂറൽ എന്നിവിടങ്ങളിലെ പൊലീസ് ഉദ്യോഗസ്ഥരുടെ പരാതികൾ സെപ്റ്റംബർ ഒമ്പതിനാണ് പരിഗണിക്കുന്നത്. പരാതികൾ സെപ്റ്റംബർ മൂന്നിന് മുമ്പ് പൊലീസ് ആസ്ഥാനത്ത് ലഭിക്കണമെന്നും നിർദ്ദേശത്തിൽ പറയുന്നു.

കൊച്ചി സിറ്റി, എറണാകുളം റൂറൽ എന്നിവിടങ്ങളിലെ പരാതികൾ സെപ്റ്റംബർ 16 ന് പരിഗണിക്കും. പരാതികൾ ലഭിക്കേണ്ട അവസാന തീയതി സെപ്റ്റംബർ ഒമ്പതാണ്. കൊല്ലം സിറ്റി, കൊല്ലം റൂറൽ ജില്ലകളിലെ പരാതികൾ സെപ്റ്റംബർ 23 നാണ് പരിഗണിക്കുക. അപേക്ഷ സ്വീകരിക്കുന്ന അവസാന തീയതി സെപ്റ്റംബർ 13 ആണ്. പരാതികൾ [email protected] എന്ന വിലാസത്തിൽ ലഭിക്കണം. പരാതിയിൽ മൊബൈൽ നമ്പർ ഉൾപ്പെടുത്തണം. ഹെൽപ്പ് ലൈൻ നമ്പർ: 9497900243.

എസ് പി സി ടോക്‌സ് വിത്ത് കോപ്‌സ് എന്ന് നാമകരണം ചെയ്തിരിക്കുന്ന പരിപാടിയിൽ സർവ്വീസിൽ ഉള്ളതും വിരമിച്ചതുമായ പൊലീസ് ഉദ്യോഗസ്ഥരുടെ സർവ്വീസ് സംബന്ധവും വ്യക്തിപരവുമായ പരാതികളാണ് പരിഗണിക്കുന്നത്. ഇവ നേരിട്ട് സംസ്ഥാന പൊലീസ് മേധാവിയുടെ ശ്രദ്ധയിൽപ്പെടുത്തി പരിഹാരം കാണാം. പൊലീസ് ഉദ്യോഗസ്ഥർക്ക് മേലധികാരി മുഖേന അല്ലാതെ നേരിട്ടുതന്നെ പരാതി നൽകാമെന്നതാണ് ഇതിന്റെ പ്രത്യേകത. പൊലീസ് ഉദ്യോഗസ്ഥരുടെ ജീവിതപങ്കാളിക്കും പരാതി നൽകാൻ സാധിക്കും.