തിരുവനന്തപുരം: മുന്മുഖ്യമന്ത്രി ഉമ്മൻ ചാണ്ടിയുടെ നിയമസഭാംഗത്വത്തിന്റെ സുവർണ ജൂബിലി ആഘോഷങ്ങളുടെ സമാപനത്തോട് അനുബന്ധിച്ച് തയാറാക്കിയ ദ അൺനോൺ വാരിയർ എന്ന ഡോക്യുമെന്ററിയുടെ പോസ്റ്റർ പ്രതിപക്ഷ നേതാവ് വിഡി സതീശൻ റിലീസ് ചെയ്തു.

ഉമ്മൻ ചാണ്ടിയുടെ അറിഞ്ഞതും അറിയപ്പെടാത്തതുമായ ഒട്ടേറെ കാര്യങ്ങൾ പ്രതിപാദിക്കുന്ന ഡോക്യുമെന്ററി വൻവിജയമാകുമെന്നു സതീശൻ ആശംസിച്ചു. ഉമ്മൻ ചാണ്ടിയെപ്പോലൊരു ഇതിഹാസത്തിന്റെ പേരിലുള്ള ചടങ്ങിൽ പങ്കെടുക്കാൻ സാധിച്ചതു ഭാഗ്യമാണെന്നും അദ്ദേഹം പറഞ്ഞു. ചാണ്ടി ഉമ്മൻ പങ്കെടുത്തു.

അഞ്ചു ഭാഷകളിലൊരുക്കിയ ഡോക്യുമെന്ററി 17നു റിലീസ് ചെയ്യുമെന്നു പ്രതീക്ഷിക്കുന്നു. മക്‌ബുൽ റഹ്മാൻ സംവിധാനം ചെയ്ത ഡോക്യുമെന്ററി ഹുനൈസ് മുഹമ്മദും ഫൈസൽ മുഹമ്മദും ചേർന്നാണു നിർമ്മിച്ചത്.

2020 സെപ്റ്റംബർ 17നാണ് ഉമ്മൻ ചാണ്ടിയുടെ നിയമസഭാംഗത്വത്തിന്റെ സുവർണ ജൂബിലിയുടെ ഒരു വർഷം നീണ്ട ആഘോഷത്തിനു തുടക്കം കുറിച്ചത്. സാമൂഹ്യക്ഷേമ പ്രവർത്തനങ്ങൾ ഉൾപ്പെടെയുള്ള വിവിധ പരിപാടികൾ അരങ്ങേറി.