സഹപ്രവർത്തകയെ വിവാഹ വാഗ്ദാനം ചെയ്ത് ഗർഭിണിയാക്കിയ ശേഷം കയ്യൊഴിഞ്ഞു; യുവതി കേസ് നൽകിയതോടെ ജാതകം ചേരില്ലെന്നും പീഡനക്കേസ് റദ്ദാക്കണമെന്നും ആവശ്യപ്പെട്ട് യുവാവ്: ഹർജി തള്ളി ബോംബെ ഹൈക്കോടതി

മുംബൈ: വിവാഹ വാഗ്ദാനം നൽകി ഗർഭിണിയാക്കിയ യുവതിയെ വിവാഹം കഴിക്കാമെന്ന വാഗ്ദാനത്തിൽ നിന്ന്, ജാതകം ചേരില്ലെന്നു പറഞ്ഞു പിന്മാറിയ ആൾക്കെതിരെയുള്ള പീഡനക്കേസ് റദ്ദാക്കണമെന്ന ഹർജി ബോംബെ ഹൈക്കോടതി തള്ളി. ജാതകപ്പൊരുത്തം വിവാഹം ചെയ്യാതിരിക്കാനുള്ള ഒഴികഴിവ് ആക്കരുതെന്നും കോടതി പറഞ്ഞു.

പഞ്ചനക്ഷത്ര ഹോട്ടലിൽ തനിക്കൊപ്പം ജോലി ചെയ്ത സഹപ്രവർത്തകയെ പ്രണയിക്കുകയും വിവാഹം ചെയ്യാമെന്നു പറഞ്ഞു ശാരീരികബന്ധത്തിലേർപ്പെടുകയും ചെയ്ത അവിഷേക് മിത്ര (32)യാണു കോടതിയെ സമീപിച്ചത്. ഗർഭിണിയായതോടെ ഇയാൾ കയ്യൊഴിഞ്ഞപ്പോഴാണു യുവതി പൊലീസിൽ പരാതി നൽകിയത്.

ഇരുവരെയും വിളിച്ചുവരുത്തി നടത്തിയ കൗൺസലിങ്ങിൽ യുവതിയെ വിവാഹം കഴിക്കാമെന്ന് പ്രതി പൊലീസിനോട് സമ്മതിച്ചു. പിന്നീടു ജാതകത്തിന്റെ പേരിൽ പിന്മാറിയപ്പോഴാണു കേസ് രജിസ്റ്റർ ചെയ്തത്.