മുബൈയിൽ വീണ്ടും ലഹരി കടത്ത്; നൈജീരിയൻ പൗരന്മാർ അറസ്റ്റിൽ; കെറ്റാമിൻ പിടിച്ചെടുത്തു

മുംബൈ: ലഹരി കടത്തിന് മഹാരാഷ്ട്രയിൽ വീണ്ടും നൈജീരിയൻ സ്വദേശികൾ അറസ്റ്റിലായി. വിപണിയിൽ 10 ലക്ഷം രൂപ വിലമതിക്കുന്ന മയക്കുമരുന്നുകളുമായി മൂന്ന് നൈജീരിയൻ പൗരന്മാരാണ് പിടിയിലായത്. ഇവരുടെ പക്കൽ നിന്നും 1,126 ഗ്രാം കെറ്റാമിൻ പിടിച്ചെടുത്തു.

മുംബൈയിലെ നായ്ഗാവ് പ്രദേശത്ത് നടത്തിയ പരിശോധനയിലാണ് ഇവരെ പിടികൂടിയത്. എൻഡിപിഎസ് ആക്ട് പ്രകാരം മൂന്ന് പേർക്കെതിരെയും കേസെടുത്തതായി ആന്റി നാർക്കോട്ടിക്സ് സെൽ അറിയിച്ചു.

കൂടുതൽ പേർക്ക് പങ്കുണ്ടോയെന്നതിൽ അന്വേഷണം തുടരുകയാണ്. നിരവധി നൈജീരിയൻ പൗരന്മാരെ മയക്കുമരുന്ന് കടത്തിന് നാർക്കോട്ടിക്സ് ബ്യൂറോ മുംബൈയിൽ അറസ്റ്റ് ചെയ്തിരുന്നു.