കുടുംബത്തെയൊന്നാകെ വകവരുത്തുമെന്ന് ഭീഷണി; അച്ഛനെ കൊന്ന യുവാവിനെ ജാമ്യത്തിലിറങ്ങപ്പോൾ 17-കാരൻ കൊലപ്പെടുത്തി
ബെംഗളൂരു: അച്ഛനെ കൊലപ്പെടുത്തിയ കേസിൽ അറസ്റ്റിലായി ജാമ്യത്തിലിറങ്ങിയ യുവാവിനെ വകവരുത്തി 17 കാരനായ മകൻ. കർണാടകയിലെ കലബുറഗി ദെഗലമാഡി ഗ്രാമത്തിലെ രാജ്കുമാറാണ്(37) കൊല്ലപ്പട്ടത്. സംഭവത്തിൽ 17-കാരനെ പൊലീസ് കസ്റ്റഡിയിലെടുത്തു.
ഏതാനും വർഷങ്ങൾക്ക് മുമ്പാണ് 17-കാരന്റെ അച്ഛനെ രാജ്കുമാർ കൊലപ്പെടുത്തിയത്. ഈ കേസിൽ അറസ്റ്റിലായി ജയിലിലായിരുന്ന ഇയാൾ അടുത്തിടെയാണ് ജാമ്യത്തിലിറങ്ങിയത്. 17-കാരന്റെ വീട്ടിലെത്തി രാജ്കുമാർ നിരന്തരം ഭീഷണി മുഴക്കിയിരുന്നു. തന്നെ അനുസരിച്ചില്ലെങ്കിൽ കുടുംബത്തെയൊന്നാകെ വകവരുത്തുമെന്നായിരുന്നു ഭീഷണി.
കഴിഞ്ഞദിവസം രാത്രിയും മദ്യപിച്ചെത്തിയ രാജ്കുമാർ 17-കാരന്റെ കുടുംബത്തിന് നേരേ ഭീഷണി മുഴക്കി. ഇതോടെയാണ് 17-കാരൻ രാജ്കുമാറിനെ ആക്രമിച്ചത്. യുവാവിനെ പിടിച്ചുതള്ളിയിട്ട ശേഷം വലിയ കല്ല് തലയിലേക്കിട്ട് കൊലപ്പെടുത്തുകയായിരുന്നു.
കൊല്ലപ്പെട്ട രാജ്കുമാർ ഗ്രാമത്തിലെ ജനങ്ങളെ പതിവായി ഉപദ്രവിച്ചിരുന്നയാളാണെന്നാണ് നാട്ടുകാർ പറയുന്നത്. എല്ലാവരും തന്നെ ബഹുമാനിക്കണമെന്നും അനുസരിക്കണമെന്നുമായിരുന്നു രാജ്കുമാറിന്റെ ആവശ്യം. ഒരുകാര്യവുമില്ലാതെ നാട്ടുകാരെ ഭീഷണിപ്പെടുത്തുന്നതും പതിവായിരുന്നു.
