കിഫ്ബി പദ്ധതി : എ ജി റിപ്പോർട്ടിലെ കണ്ടെത്തലുകൾ സർക്കാരിന്റെ അവകാശവാദങ്ങളുടെ പൊള്ളത്തരം പുറത്താക്കി; സമഗ്ര വിജിലൻസ് അന്വേഷണത്തിനു സർക്കാർ തയ്യാറാകണം എന്ന് രമേശ് ചെന്നിത്തല

തിരുവനന്തപുരം: കിഫ്ബിയുടെ പ്രവർത്തനങ്ങളെ സംബന്ധിച്ച അക്കൗണ്ടന്റ് ജനറലിന്റെ ലോക്കൽ ഓഡിറ്റ് റിപ്പോർട്ടിലെ കണ്ടെത്തലുകൾ ഗൗരവതരവും , സർക്കാരിന്റെ അവകാശവാദങ്ങളുടെ പൊള്ളത്തരം വെളിവാക്കുന്നതുമാണെന്ന് കോൺഗ്രസ് നേതാവ് രമേശ് ചെന്നിത്തല.

കിഫ്ബിയിലെ ക്രമവിരുദ്ധ നടപടികളെ സംബന്ധിച്ച് പ്രതിപക്ഷം ഉയർത്തിയ ആരോപണങ്ങളെല്ലാം സത്യമാണെന്ന് ഇതോടെ തെളിഞ്ഞിരിക്കുകയാണ്. കൊള്ളപ്പലിശ നൽകി മസാലബോണ്ടിലൂടെ സമാഹരിച്ച ഫണ്ടിന്റെ തെറ്റായ രീതിയുള്ള നിക്ഷേപത്തെത്തുടർന്ന് കോടിക്കണക്കിന് രൂപ പലിശ ഇനത്തിൽ മാത്രം നഷ്ടം സംഭവിച്ചതായി ഓഡിറ്റ് റിപ്പോർട്ടിൽ പരാമർശമുണ്ട്. ഇത് സംബന്ധിച്ച് പ്രതിപക്ഷം മുൻപ് ആക്ഷേപം ഉന്നയിച്ചപ്പോൾ പ്രതിപക്ഷത്തെ അപഹസിക്കുന്ന സമീപനമാണ് മുൻ ധനകാര്യമന്ത്രിയും കിഫ്ബി മാനേജ്മെന്റും സ്വീകരിച്ചത്.

മാത്രമല്ല കേട്ടുകേൾവി ഇല്ലാത്ത വിധത്തിൽ വൻ തുക ശമ്പളവും, അലവൻസും നൽകി വഴിവിട്ട മാർഗ്ഗത്തിലൂടെ കരാർ നിയമനങ്ങൾ നടത്തിയതിലൂടെ കോടിക്കണക്കിന് രൂപ നഷ്ടംസംഭവിച്ചതായും ഓഡിറ്റ് റിപ്പോർട്ടിലൂടെ വ്യക്തമായിട്ടുണ്ട്. സംവരണതത്ത്വങ്ങൾപാലിക്കാതെയും, സർക്കാരിന്റെ തന്നെ മുൻ മാർഗ്ഗനിർദേശങ്ങൾ അട്ടിമറിച്ചുമാണ് ഈ നിയമനങ്ങൾ നടന്നിരിക്കുന്നത്. ഇല്ലാത്ത തസ്തികകളിലേക്ക് ഉയർന്ന ശമ്പള സ്‌കെയിലിൽ ഉദ്യോഗസ്ഥരെ നിയമിച്ചതടക്കമുള്ള കാര്യങ്ങൾ റിപ്പോർട്ടിൽ പരാമർശിച്ചിട്ടുണ്ട്. മസാലബോണ്ടുമായി ബന്ധപ്പെട്ട കാര്യങ്ങളെ സംബന്ധിച്ച റിപ്പോർട്ടിൽ റിസർവ്വ് ബാങ്ക് ഓഫ് ഇന്ത്യയ്ക്ക് കൃത്യമായി റിപ്പോർട്ട് നൽകുന്നതിലെ പാളിച്ച കാരണം 1 ലക്ഷം രൂപ കിഫ്ബിക്ക് പെനാൽറ്റി നൽകേണ്ടി വന്നതായും പറയുന്നുണ്ട്.

ഈ സാഹചര്യത്തിൽ സർക്കാർ ഇനിയും ഉരുണ്ടുകളിക്കാതെ എജിയുടെ കണ്ടെത്തലുകളെ സംബന്ധിച്ച് സമഗ്രമായ വിജിലൻസ് അന്വേഷണത്തിന് ഉത്തരവിടണം.കിഫ്ബി മാനേജ്മെന്റിന്റെ കെടുകാര്യസ്ഥതയും, കുത്തഴിഞ്ഞ ധനകാര്യ മാനേജ്മെന്റും കാരണം ഖജനാവിന് സംഭവിച്ച നഷ്ടം ബന്ധപ്പെട്ട ഉദ്യോഗസ്ഥരിൽ നിന്നും തിരിച്ചു പിടിക്കണം. ഇവിടെ നടന്നിട്ടുള്ള എല്ലാ അനധികൃത നിയമനങ്ങളും വിജിലൻസ് അന്വേഷണത്തിന്റെ പരിധിയിൽ കൊണ്ടുവരണം. നിയമസഭയ്ക്കോ, ധനകാര്യവകുപ്പിനോ പോലും നിയന്ത്രണമില്ലാത്ത സൂപ്പർ ധനകാര്യസ്ഥാപനമെന്ന നിലയിലാണ് കിഫ്ബിമാനേജ്മെന്റിന്റെ പ്രവർത്തനം. ഇനിയും കിഫ്ബിയെ ഇങ്ങനെ കയറൂരി വിടുന്നത് കേരളത്തിന്റെ വിശാലതാൽപര്യങ്ങൾക്ക് ഒട്ടും യോജിച്ചതല്ല എന്നും രമേശ് ചെന്നിത്തല പറഞ്ഞു.