വസ്തുതർക്കത്തിൽ അയൽവാസികൾ തമ്മിൽ വാക്കേറ്റം: അട്ടപ്പാടിയിൽ ആദിവാസി യുവതിക്ക് വെട്ടേറ്റു

പാലക്കാട്: വസ്തുതർക്കത്തെ തുടർന്ന് അട്ടപ്പാടിയിൽ അയൽവാസികൾ തമ്മിലുണ്ടായ സംഘർഷത്തിനിടെ ആദിവാസി യുവതിക്ക് വെട്ടേറ്റു. ചാളയൂർ സ്വദേശി പാപ്പാത്തിക്കാണ് വെട്ടേറ്റത്. വ്യാഴാഴ്ച രാവിലെയാണ് സംഭവം.

അയൽവാസികൾ തമ്മിൽ വസ്തുതർക്കം നിലനിന്നിരുന്നു. ഇതേച്ചൊല്ലി വാക്കേറ്റമുണ്ടാവുകയും അയൽവാസിയായ ഗുരുസ്വാമി എന്നയാൾ പാപ്പാത്തിയുടെ തലയ്ക്ക് വെട്ടുകയുമായിരുന്നു എന്നാണ് വിവരം. പരിക്കേറ്റ പാപ്പാത്തിയെ അട്ടപ്പാടി അഗളിയിലെ കോട്ടത്തറ ട്രൈബൽ ആശുപത്രിയിൽ പ്രവേശിപ്പിച്ചിരിക്കുകയാണ്. യാതൊരു പ്രകോപനവുമില്ലാതെയാണ് ഗുരുസ്വാമി തന്നെ ആക്രമിച്ചതെന്നാണ് പാപ്പാത്തി പറയുന്നത്.