തീർത്തും ഞെട്ടിപ്പിക്കുന്നതും അവിശ്വസനീയവും; ബിഗ് സല്യൂട്ട്; ജനറൽ ബിപിൻ റാവത്തിന്റെ വിയോഗത്തിൽ മമ്മൂട്ടി

കൊച്ചി: സംയുക്ത സൈനിക മേധാവി ജനറൽ ബിപിൻ റാവത്തിന്റെ വിയോഗത്തിൽ വേദന പങ്കുവെച്ച് നടൻ മമ്മൂട്ടി. തീർത്തും അവിശ്വസനീയമാണ് അദ്ദേഹത്തിന്റെ മരണം എന്ന് മമ്മൂട്ടി പറഞ്ഞു. ഫേസ്‌ബുക്കിലൂടെയാണ് അദ്ദേഹത്തിന്റെ പ്രതികരണം.'തീർത്തും ഞെട്ടിപ്പിക്കുന്നതും അവിശ്വസനീയവുമാണ് രാഷ്ട്രത്തിന്റെ ധീരനായ സൈനിക ജനറൽ ബിപിൻ റാവത്തിനും ശ്രീമതി മധുലിക റാവത്തിനും സല്യൂട്ട്. ഈ ദാരുണമായ അപകടത്തിൽ തങ്ങളുടെ പ്രിയപ്പെട്ടവരെ നഷ്ടപ്പെട്ടവർക്ക് അനുശോചനം അറിയിക്കുന്നു', മമ്മൂട്ടി ഫേസ്‌ബുക്കിൽ കുറിച്ചു.

ബിപിൻ റാവത്തിന്റെ വിയോഗത്തിൽ മോഹൻലാൽ, സുരേഷ് ഗോപി, മഞ്ജു വാര്യർ തുടങ്ങി സിനിമ മേഖലയിലെ നിരവധിപ്പേർ അനുശോചനം അറിയിച്ചിട്ടുണ്ട്. ഇന്ത്യയുടെ തീരാനഷ്ടമാണ് അദ്ദേഹത്തിന്റെ വിയോഗമെന്ന് മോഹൻലാൽ പറഞ്ഞു. അദ്ദേഹത്തിന്റെ വിലപ്പെട്ട സംഭാവനകളും പ്രവർത്തനങ്ങളും രാഷ്ട്രത്തിന് എന്നും മുതൽക്കൂട്ടാണ് എന്നും മോഹൻലാൽ പറഞ്ഞു.