ശ്രീനഗർ: ജമ്മുകശ്മീരിലുണ്ടായ ഭീകരാക്രമണത്തിൽ രണ്ട് പൊലീസ് ഉദ്യോഗസ്ഥർ കൊല്ലപ്പെട്ടു. കശ്മീരിലെ ബന്ദിപോര ജില്ലയിൽ ഭീകരർ പൊലീസിന് നേരെ വെടിയുതിർക്കുകയായിരുന്നു. ഗുൽഷാൻ ചൗക്കിൽ ഇന്ന് വൈകീട്ടോടെയായിരുന്നു സംഭവം.

വെടിവെപ്പിൽ ഗുരുതരമായി പരിക്കേറ്റ രണ്ടു പൊലീസുകാർ ആശുപത്രിയിലേക്ക് കൊണ്ടുപോകും വഴിയാണ് മരിച്ചതെന്ന് അധികൃതർ പറഞ്ഞു. മുഹമ്മദ് സുൽത്താൻ, ഫയാസ് അഹമ്മദ് എന്നീ പൊലീസ് ഉദ്യോഗസ്ഥരാണ് കൊല്ലപ്പെട്ടത്.

സുരക്ഷാസേന പ്രദേശം വളഞ്ഞിട്ടുണ്ട്. അക്രമികൾക്കായി തിരച്ചിൽ നടത്തുകയാണ്. ആക്രമണത്തിൽ ജമ്മുകശ്മീർ മുൻ മുഖ്യന്ത്രി ഒമർ അബ്ദുള്ള അനുശോചിച്ചു. കശ്മീരിലെ കുടിയേറ്റ തൊഴിലാളികൾക്കും ന്യൂനപക്ഷ സമുദായാംഗങ്ങൾക്കും നേരെ അടുത്തിടെ നടന്ന ആക്രമണങ്ങൾക്ക് ശേഷം താഴ്‌വരയിൽ നടക്കുന്ന ആദ്യത്തെ വലിയ ഭീകരാക്രമണമാണിത്.