രാജാക്കാട്: ഉണ്ടമലയിൽ മാരകായുധങ്ങളുമായി എത്തിയ ഗുണ്ടാസംഘം വീട്ടമ്മയെ ആക്രമിച്ചതായി പരാതി.ആക്രമണത്തിൽ വീട്ടമ്മയുടെ കാലിനു ഗുരുതരമായി പരുക്കേറ്റതായി ഇവർ പൊലീസിൽ പരാതി നൽകി. കഴിഞ്ഞ 18 ന് രാത്രി ചക്കുങ്കൽ മേരി ജോസഫിനെയും കുടുംബത്തെയുമാണ് എട്ടംഗ സംഘം മാരകായുധങ്ങളുമായി ആക്രമിച്ചത്. ആയുധങ്ങളും ഒഴിഞ്ഞ ബീയർ കുപ്പികളുമായാണ് സംഘം ആക്രമണത്തിനെത്തിയത്. സമീപവാസിയായ യുവാവ് മേരിയുടെ ഇളയമകനെക്കുറിച്ച് അപവാദം പ്രചരിപ്പിച്ചത് ഇവർ ചോദ്യം ചെയ്തതാണ് ആക്രമണത്തിനു കാരണം.

മേരിയുടെ 14 വയസ്സുള്ള കൊച്ചുമകനും ആക്രമണത്തിൽ പരുക്കേറ്റു. മേരിയുടെ ഇടതുകാലിനു പൊട്ടലുണ്ട്. തന്റെ വസ്ത്രം വലിച്ചു കീറി ഉപദ്രവിക്കാൻ ശ്രമിച്ചതായും മേരി പറയുന്നു. ആക്രമണത്തിനു ശേഷം ഗുണ്ടാ സംഘം കടന്നുകളഞ്ഞു. പൊലീസ് എത്തിയതിനു ശേഷമാണ് മേരിയെയും കുടുംബാംഗങ്ങളെയും അടിമാലി താലൂക്ക് ആശുപത്രിയിൽ പ്രവേശിപ്പിച്ചത്. കാലിന് പ്ലാസ്റ്റർ ഇട്ട മേരി കഴിഞ്ഞ ദിവസം വീട്ടിൽ മടങ്ങിയെത്തുകയു ചെയ്തു.

ഗുണ്ടാസംഘത്തിന്റെ ആക്രമണം നടക്കുമ്പോൾ മേരിയുടെ മകൻ ജിബിൻ സ്വയരക്ഷയ്ക്കായി കത്തി വീശുകയും ഗുണ്ടാസംഘത്തിൽ പെട്ടവർക്ക് പരുക്കേൽക്കുകയും ചെയ്തു. ഈ സംഭവത്തിൽ ജിബിനെ പൊലീസ് അറസ്റ്റ് ചെയ്തു. പരുക്കേറ്റ ജിബിനു ചികിത്സ നൽകാൻ പൊലീസ് തയാറായില്ലെന്നു മേരി പറയുന്നു. പ്രതികൾക്കെതിരെ ജാമ്യമില്ലാ വകുപ്പ് പ്രകാരം കേസെടുത്ത് അന്വേഷണം നടക്കുന്നതായി രാജാക്കാട് പൊലീസ് അറിയിച്ചു.

 

ആക്രമിച്ചുഗുണ്ടാസംഘംവീട്ടമ്മ