ബീച്ച് ഫോട്ടോഷൂട്ട് പായൽ നിറഞ്ഞ പാറയുടെ മുകളിൽ ഇരുന്നു; തൊട്ടടുത്ത നിമിഷം യുവതിയെ മൂടി വൻ തിരമാല; സുഹൃത്തുക്കളിലേക്ക് ചിരി പടർത്തി രംഗങ്ങൾ

പംഗസിനാൻ: ഫിലിപ്പീൻസിലെ പംഗസിനാൻ പ്രവിശ്യയിൽ നിന്നും ചിത്രീകരിച്ച ബീച്ച് ഫോട്ടോഷൂട്ടിന്റെ ദൃശ്യങ്ങളാണ് സാമൂഹ്യ മാധ്യമങ്ങളിൽ ഇപ്പോൾ വൈറലാകുന്നത്. കടൽത്തീരത്ത് പായൽ നിറഞ്ഞ പാറകളിൽ ചാരിയിരുന്ന ഫോട്ടോയ്ക്ക് പോസ് ചെയ്ത യുവതി വൻ തിരമാലയിൽ മുങ്ങിപ്പോകുന്നതാണ് ദൃശ്യങ്ങളിൽ.

ക്യാമറയിൽ ഒരു പോസ് അടിക്കുമ്പോഴേക്കും തിരമാല യുവതിയെ മൂടുകയായിരുന്നു. പായൽ നിറഞ്ഞ പാറയിലേക്ക് അടിച്ചു കയറിയ തിരമാലയിൽ യുവതി തെന്നി നീങ്ങുന്നു. എഴുനേറ്റ് നടക്കാനുള്ള ശ്രമത്തിനിടെ പാറയിലെ ഒരു ഗർത്തത്തിലേക്ക് യുവതി വീണു പോകുന്നതുമാണ് ദൃശ്യങ്ങളിൽ ഉള്ളത്. തെന്നി വീണതിനെ തുടർന്ന് യുവതിക്ക് ചെറിയ പരുക്ക് പറ്റി.

സൺഗ്ലാസും കറുത്ത സ്ട്രാപ്പി ടോപ്പും ഷോർട്ട്‌സും ധരിച്ചാണ് യുവതി ഫോട്ടോ ഷൂട്ടിനായി തയ്യാറെടുത്തത്. ഫോട്ടോയ്ക്ക് പോസ് ചെയ്യുന്നതിനിടെ തിരമാല അടിച്ചു കയറുകയായിരുന്നു. ഇത് കണ്ട സുഹൃത്തുക്കൾ നിലവിളിച്ചു. എന്നാൽ അപ്പോഴേക്കും തിരമാല അടുത്തെത്തിയിരുന്നു.

തിരമാലയിൽ കുതിർന്നതിന്റെ നിരാശയിൽ യുവതി നിൽക്കുമ്പോൾ ഒപ്പമുണ്ടായിരുന്ന മൂന്ന് പുരുഷ സുഹൃത്തുക്കളും പൊട്ടിച്ചിരിക്കുന്നതും ദൃശ്യങ്ങളിൽ ഉണ്ട്. അവളുടെ ദൗർഭാഗ്യത്തിൽ സന്തോഷിക്കുമ്പോൾ ക്യാമറ കൈവശമുള്ള പുരുഷൻ തന്നിലേക്ക് തന്നെ ഫോക്കസ് ചെയ്യുന്നതും ദൃശ്യങ്ങളിൽ കാണാം.