വികസനത്തിന്റെ പേരിൽ മുഖ്യമന്ത്രി നടത്തുന്ന കൊള്ള അനുവദിക്കില്ല; കെ റെയിൽ പദ്ധതി പാർട്ടിക്ക് പണം ഉണ്ടാക്കാൻ വേണ്ടി മാത്രമാണ്; പദ്ധതിക്ക് വേണ്ടി പിണറായി വാശി പിടിക്കുന്നത് അതുകൊണ്ടാണെന്നും കെ സുധാകരൻ

കണ്ണൂർ: വികസനത്തിന്റെ പേര് പറഞ്ഞ് മുഖ്യമന്ത്രി പിണറായി വിജയൻ നടത്തുന്ന കൊള്ള ഒരു തരത്തിലും അനുവദിക്കാനാവില്ലെന്ന് കെപിസിസി പ്രസിഡന്റ് കെ സുധാകരൻ എം പി. കണ്ണൂർ ഡിസിസി ഓഫീസിൽ നടന്ന കണ്ണൂർ- കാസർകോഡ് ജില്ലകളിലെ കെപിസിസി ഭാരവാഹികൾ, കെപിസിസി മെമ്പർമാർ, ഡിസിസി- ബ്ലോക്ക് കോൺഗ്രസ് പ്രസിഡന്റുമാർ, പോഷക സംഘടനാ ജില്ലാ പ്രസിഡന്റുമാർ സംസ്ഥാന ഭാരവാഹികൾ, മണ്ഡലം കോൺഗ്രസ് പ്രസിഡന്റുമാരുടെയും യോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

കെ- റെയിൽ പദ്ധതി വന്നാലുണ്ടാകുന്ന ഭവിഷ്യത്ത് ജനങ്ങളിലെത്തിക്കണം. ഇപ്പോൾ തന്നെ സിൽവർ ലൈൻ പദ്ധതി കടന്നുപോകുന്ന വഴിയിലെ ജനങ്ങൾ മനസിലാക്കി കഴിഞ്ഞു. അവർ പ്രതികരിക്കുന്നത് നാം കാണുന്നതാണ്. പാരിസ്ഥിതികാഘാത പഠനമോ സാമൂഹികാഘാത പഠനമോ നടത്താതെയാണ് പദ്ധതി നടപ്പിലാക്കുമെന്ന് പ്രഖ്യാപിച്ചിരിക്കുന്നത്. ആരാണ് പിണറായിക്ക് കേരളത്തിലെ ജനങ്ങളുടെ ഭൂമി എടുക്കാൻ അനുമതി കൊടുത്തത്. വികസനത്തിന്റെ പേരു പറഞ്ഞ് നടത്തുന്ന കെ- റെയിൽ പദ്ധതി പാർട്ടിക്ക് പണം ഉണ്ടാക്കാൻ വേണ്ടി മാത്രമാണ്. അതാണ് അദ്ദേഹം പദ്ധതിക്ക് വേണ്ടി വാശിപിടിക്കുന്നതെന്നും സുധാകരൻ പറഞ്ഞു.

കെ- റെയിലിനെതിരെ കോൺഗ്രസും യുഡിഎഫും നടത്തുന്ന പ്രക്ഷോഭം ശരിക്കും പഠിച്ച ശേഷമാണ്. ഈ മേഖലയിലെ പ്രമുഖരുമായി പല തവണ ആശയവിനിമയം നടത്തിയിട്ടുണ്ട്. ഇന്ത്യൻ റെയിൽവെയുടെ മെട്രോമാനായ ശ്രീധരൻ പോലും പദ്ധതി വന്നാലുണ്ടായാലുള്ള ഭീകരത പറഞ്ഞിട്ടുണ്ട്. അതുപോലെ എന്നും സിപിഎമ്മിനെ പിന്തുണക്കുന്ന ശാസ്ത്ര-സാഹിത്യ പരിഷത്ത് പോലും പദ്ധതിയെ എതിർക്കുന്നു.ഇത്രയും എതിർപ്പ് വാങ്ങി എന്തിനാണ് കെ റെയിൽ പദ്ധതിക്ക് വേണ്ടി വാശിപിടിക്കുന്നതെന്നും സുധാകരൻ ചോദിച്ചു.

കെ- റെയിൽ പദ്ധതിയുടെ ഡിപിആർ പുറത്തിറക്കാൻ തയ്യാറായിട്ടില്ല. ചില ഏതാനും പേജുകൾ മാത്രം ജനങ്ങളുടെ മുന്നിലേക്കിട്ട് ഒളിച്ച് കളി നടത്തുകയാണ്. പദ്ധതി സംബന്ധിച്ച് നിയമസഭയിൽ പോലും ചർച്ച ചെയ്യാതെ ഒളിച്ച് കളിച്ചവർ ഇപ്പോൾ പറയുന്ന നിയമസഭയിൽ ചർച്ച ചെയ്തുവെന്ന്. പദ്ധതിയുമായി ബന്ധപ്പെട്ട് പിണറായി വിജയൻ ജനങ്ങളെ കബളിപ്പിക്കുകയാണെന്നും സുധാകരൻ പറഞ്ഞു.

കോൺഗ്രസ് ഏറ്റെടുത്ത സമരം വിജയിപ്പിക്കാൻ ഓരോ കോൺഗ്രസ് പ്രവർത്തകനും തയ്യാറായി മുന്നോട്ട് വരണം. കോൺഗ്രസ് വികസനത്തിന് എതിരല്ല. യോഗത്തിൽ ഡിസിസി പ്രസിഡന്റ് അഡ്വ, മാർട്ടിൻ ജോർജ്ജ്, കെപിസിസി ജനറൽ സെക്രട്ടറി സി ചന്ദ്രൻ, സണ്ണിജോസഫ് എം എൽ,എ, സതീശൻ പാച്ചേനി, ഹക്കീം കുന്നേൽ, കെ പി കുഞ്ഞിക്കണ്ണൻ കാസർഗോഡ് ജില്ലാ പ്രസിഡന്റ് പി കെ ഫൈസൽ എന്നിവർ സംസാരിച്ചു,.വി എ നാരായണൻ, സജീവ് മാറോളി, കെ എൽ പൗലോസ്, പി ടി മാത്യു, എം നാരായണൻ കുട്ടി തുടങ്ങിയവർ സംബന്ധിച്ചു.