കണ്ണൂർ: വനിതകൾക്ക് കൈത്താങ്ങായി കേരളാബാങ്ക് .സ്ത്രീകളുടെ തൊഴിലവസരം വർദ്ധിപ്പിക്കുന്നതിന് കേരളാ ബാങ്ക് വായ്പ നൽകും. മഹിളാ ശക്തി സ്വയം തൊഴിൽ സഹായ വായ്പാ പദ്ധതി ജില്ലയിൽ നടപ്പാക്കുന്നതിന്റെ ഭാഗമായി ജില്ലയിലെ തെരഞ്ഞെടുത്ത വനിതാ സൊസൈറ്റി സെക്രട്ടറിമാരുടെ ശിൽപ്പശാല കേരളാ ബാങ്ക് റീജിയണൽ ഓഫീസിൽ നടന്നു. വനിതാ സഹകരണ സംഘങ്ങളിൽ അംഗങ്ങളായ സ്ത്രീകൾക്ക് ഒറ്റക്കോ ഗ്രൂപ്പുകളായോ സ്വയം തൊഴിൽ ആരംഭിക്കാനാണ് വായ്പ. അവർ അംഗങ്ങളായിട്ടുള്ള വനിതാ സഹകരണ സംഘങ്ങൾ മുഖേനെയാണ് വായ്പ അനുവദിക്കുക.

ഫുഡ് കാറ്ററിങ് നടത്തുന്ന വനിതകൾക്ക് ഒരു ലക്ഷം രൂപ വരെ നൽകുന്ന അന്നപൂർണ്ണ, വനിതകളുടെ വിവിധ കച്ചവട സംരംഭങ്ങളെ പ്രോത്സാഹിപ്പിക്കുന്നതിന് അഞ്ചുലക്ഷം വരെ അനുവദിക്കുന്ന ബിസിനസ്സ് വനിത വായ്പ, ബ്യൂട്ടിപാർലർ, ട്യൂഷൻ, തയ്യൽ, ഡേ കെയർ തുടങ്ങി ചെറുകിട സംരംഭങ്ങൾക്കായി 2 ലക്ഷം രൂപ വരെ വനിത മുദ്ര, സർക്കാർ സംരംഭങ്ങളുടെ ഭാഗമായുള്ള കച്ചവടം ചെയ്യുന്നവർക്ക് സംരംഭത്തിന്റെ 50% വരെ നൽകുന്ന വനിത വികസന വായ്പ, 45000 രൂപയിൽ താഴെ വാർഷിക വരുമാനമുള്ള 18 നും 45 വയസ്സിനും ഇടയിൽ പ്രായമുള്ള സ്ത്രീകൾക്ക് സംരംഭം തുടങ്ങാൻ ഒരു ലക്ഷം രൂപ വരെ അനുവദിക്കുന്ന ഉദ്യോഗിനി വായ്പ, ഗ്രാമീണ മേഖലയിലെ വനിതകളുടെ പുനരുദ്ധാരണവും ആരോഗ്യപരിപാലനവും ഉറപ്പു വരുത്തുന്ന പദ്ധതികൾക്കായി അമ്പതിനായിരം രൂപ വരെ കുറഞ്ഞ പലിശ നിരക്കിൽ അനുവദിക്കുന്ന വനിതാ ശക്തികേന്ദ്ര പദ്ധതി എന്നിവയാണ് മഹിളാ ശക്തി വായ്പകളിൽ പ്രധാനം.

കൂടാതെ വനിതാ സഹകരണസംഘങ്ങൾ നേരിട്ട് നടത്തുന്ന സംരംഭങ്ങൾക്ക് വർക്കിങ് ക്യാപിറ്റൽ ക്യാഷ് ക്രെഡിറ്റ്, സ്വർണ്ണ പണയ ക്യാഷ് ക്രെഡിറ്റ് എന്നിവയും നൽകും. സ്വയംസഹായസംഘങ്ങളിലും കുടുംബശ്രീകളിലും അംഗങ്ങളായ സ്ത്രീ കൾക്ക് മഹിളാ ശക്തി വിഭാഗത്തിൽ പെട്ട വായ്പകൾ , വിവിധ തരം ചെറുകിട സംരംഭ വായ്പകൾ, ഭക്ഷ്യ സംസ്‌കരണ സൂക്ഷ്മ വ്യവസായ വായ്പകൾ ഇവക്ക് അർഹതപ്പെട്ട മേഖലകളിൽ കേന്ദ്ര സംസ്ഥാന സർക്കാരും, നബാർഡും അനുവദിക്കുന്ന പലിശ ഇളവിന് അർഹത ഉണ്ടായിരിക്കും.

റീജിയണൽ ഓഫീസിൽ നടന്ന ശിലാപശാലയിൽ ഡയറക്ടർ കെ.ജി വത്സല കുമാരി അധ്യക്ഷയായി. ജനറൽ മാനേജർ എം പി ഷിബു, ഡി ജി എം പി പി മനോജ് എന്നിവർ സംസാരിച്ചു.

അനീഷ് കുമാര്‍

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍