സന്ദർശക വിസയിൽ ഖത്തറിലെത്തിയ മലയാളി യുവതി വാഹനാപകടത്തിൽ മരിച്ചു

ദോഹ: സന്ദർശക വിസയിൽ ഖത്തറിലെത്തിയ മലയാളി യുവതി വാഹനാപകടത്തിൽ മരിച്ചു. കൊല്ലം നെടുവത്തൂർ സ്വദേശി ചിപ്പി വർഗീസ് (25) ആണ് മരിച്ചത്. ചൊവ്വാഴ്ച രാത്രി ഭർത്താവിനും മകനുമൊപ്പം കാറിൽ യാത്ര ചെയ്യവെയുണ്ടായ വാഹനാപകടത്തിലായിരുന്നു അന്ത്യം.

ചൊവ്വാഴ്ച രാത്രി വുകൈർ ഭാഗത്തുണ്ടായ വാഹനാപകടത്തിലായിരുന്നു അന്ത്യം. പരിക്കേറ്റ ഭർത്താവും മകനും ഹമദ് ആശുപത്രിയിൽ ചികിത്സയിലാണ്. ചിപ്പി വർഗീസിന്റെ മൃതദേഹം വക്‌റയിലെ ഹമദ് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.

കൊല്ലം നെടുവത്തൂർ അമ്പലത്തുംകലയിലെ സി.വി വില്ലയിൽ വർഗീസിന്റെയും ഷൈനിയുടെയും മകളായ ചിപ്പി, ആഴ്ചകൾക്ക് മുമ്പാണ് മൂന്ന് മാസം പ്രായമുള്ള മകൻ ലൂക്കിനൊപ്പം ഖത്തറിൽ ജോലി ചെയ്യുന്ന ഭർത്താവ് ജെറിൻ ജോൺസന്റെ അടുത്തെത്തിയത്.