പ്രതിശ്രുത വധുവിനെ ലോഡ്ജിൽ വിളിച്ചുവരുത്തി പീഡിപ്പിച്ചു; വിവാഹത്തിൽ നിന്നും പിന്മാറിയ യുവാവിന് എതിരെ കേസ്

കണ്ണൂർ: പ്രതിശ്രുത വധുവിനെ പീഡനത്തിനിരയാക്കിയ ശേഷം വിവാഹത്തിൽ നിന്നും പിന്മാറിയ യുവാവിനെതിരെ കേസെടുത്തു. തളിപ്പറമ്പ് ഏഴോം നരിക്കോട് സ്വദേശി പ്രബീനെതിരെ(29)യാണ് കണ്ണൂർ സിറ്റി പൊലിസ് ബലാത്സംഗ കുറ്റത്തിന് കേസെടുത്തത്. പ്രലോഭിപ്പിച്ച് വിവിധ ലോഡ്ജുകളിൽ കൊണ്ടു പോയി ലൈംഗിക ചൂഷണത്തിനിരയാക്കുകയും നിശ്ചയിച്ച വിവാഹത്തിൽ പിന്മാറുകയും ചെയ്തുവെന്ന യുവതിയുടെ പരാതിയിലാണ് നടപടി.

സിറ്റി ആദികടലായി കുറുവ സ്വദേശിനിയാണ് പരാതിക്കാരി.ഒന്നര വർഷത്തിന് ശേഷം യുവതിയെ വിവാഹം കഴിക്കാമെന്ന ഉറപ്പിൽ ഇരുവരുടെയും കുടുംബക്കാർ തമ്മിൽ വിവാഹനിശ്ചയം നടത്തിയിരുന്നു. ഇതിനിടയിൽ മൊബൈൽ ഫോൺ സൗഹൃദമുണ്ടാക്കുകയും ഇരുവരും പരസ്പരം വിളിക്കുകയും ചെയ്തിരുന്നു.

ദിവസങ്ങൾക്ക് മുൻപ് യുവാവ് കണ്ണൂരിലെ സ്വകാര്യലോഡ്ജിൽ മുറിയെടുത്ത് യുവതിയെ വിളിച്ചു വരുത്തി ലൈംഗികചൂഷണത്തിന് ഇരയാക്കുകയും പിന്നീട് നിശ്ചയിച്ച വിവാഹത്തിൽ നിന്നും പിന്മാറുകയുമായിരുന്നു.

വിവാഹത്തിൽ നിന്ന് യുവാവ് പിന്മാറിയതോടെ വഞ്ചിക്കപ്പെട്ട യുവതി കണ്ണൂർസിറ്റി പൊലിസിൽ പരാതി നൽകുകയായിരുന്നു. ഇവരുടെ മൊഴിയെടുത്തതിനു ശേഷമാണ് പൊലിസ് കേസെടുത്ത് അന്വേഷണമാരംഭിച്ചത്. സംഭവത്തിന് ശേഷം പ്രതിയായ പ്രബിൻ ഒളിവിൽ പോയിരിക്കുകയാണ്.