ആലപ്പുഴയിൽ പട്രോളിംഗിനിടെ എസ്‌ഐയ്ക്ക് നേരെ ആക്രമണം; മദ്യലഹരിയിൽ വടിവാളുകൊണ്ടു വെട്ടി; പ്രതി പൊലീസ് കസ്റ്റഡിയിൽ
ആലപ്പുഴ: പട്രോളിംഗിനിടെ നൂറനാട് സ്റ്റേഷൻ എസ്‌ഐയ്ക്ക് നേരെ ആക്രമണം. എസ് ഐ വി. ആർ. അരുൺ കുമാറിന് വെട്ടേറ്റു. നൂറനാട് സ്വദേശി സുഗതനാണ് എസ്‌ഐയെ വടിവാളുകൊണ്ടു വെട്ടിയത്. ഇയാളെ പൊലീസ് കസ്റ്റഡിയിലെടുത്തു. പട്രോളിംഗിനിടെയാണ് എസ്‌ഐയ്ക്കെതിരെ ആക്രമണമുണ്ടായത്. കൈയ്ക്കും ചൂണ്ടുവിരലിനും ഗുരുതരമായി പരിക്കേറ്റ അരുൺ കുമാറിനെ ആശുപത്രിയിൽ പ്രവേശിപ്പിച്ചു.
വൈകീട്ടാണ് അരുൺ കുമാറിനു നേരെ ആക്രമണമുണ്ടായത്. സഹോദരനെ ഉപദ്രവിച്ചുവെന്ന പേരിൽ പ്രതിയായ സുഗതനെതിരെ ഇന്ന് ഉച്ചയ്ക്ക് സ്റ്റേഷനിൽ പരാതി വന്നിരുന്നു. ഇതിനെ തുടർന്ന് സുഗതനെ സ്റ്റേഷനിൽ വിളിച്ചുവരുത്തുകയും പ്രശ്നം പരിഹരിക്കുകയും ചെയ്തു.
അതേസമയം, സുഗതൻ എസ്‌ഐയോട് മോശമായി പെരുമാറിയിരുന്നുവെന്ന് സഹ പൊലീസ് ഉദ്യോഗസ്ഥർ വ്യക്തമാക്കി. പിന്നീട് വൈകീട്ട് പട്രോളിംഗിനിറങ്ങിയ എസ്‌ഐയെ സുഗതൻ ബൈക്കിൽ വന്ന് വടിവാളിന് വെട്ടുകയായിരുന്നു. ഇയാൾ മദ്യ ലഹരിയിലായിരുന്നുവെന്നാണ് പൊലീസിന്റെ നിഗമനം. സുഗതന്റെ അറസ്റ്റ് പൊലീസ് രേഖപ്പെടുത്തിയിട്ടുണ്ട്.
