കണ്ണൂർ: കണ്ണൂരിൽ റെയിൽവേ എക്സാമിനർ ചമഞ്ഞ് തൊഴിലന്വേഷകരിൽ നിന്നും ലക്ഷങ്ങൾ തട്ടിയ ബിൻഷ ഐസക്കിന്റെ മാഡത്തെ തേടി അന്വേഷണ സംഘം കോട്ടയത്തേക്ക്. നേരത്തെ കണ്ണൂർ സ്വദേശിനിയാണ് മാഡമെന്ന് പറഞ്ഞ് ബിൻഷ ഐസക്ക് പൊലിസിനെ കബളിപ്പിക്കുകയായിരുന്നുവെന്നാണ് സൂചന. ബിൻഷയുടെ മാഡം കോട്ടയംകാരിയാണെന്ന് കണ്ണൂർ ടൗൺ പൊലിസ് ഇപ്പോൾ നൽകുന്ന സൂചന. ബിൻഷയുടെ മൊബൈൽ ഫോൺ സൈബർ പൊലിസ് അന്വേഷിച്ചപ്പോഴാണ് ഇവരെ കുറിച്ചുള്ള വ്യക്തമായ വിവരങ്ങൾ ലഭിച്ചത്.

കോട്ടയം ജില്ലയിലെ ഒരു സ്ഥലത്തെ മൊബൈൽ ടവർ ലൊക്കേഷൻ കേന്ദ്രീകരിച്ചാണ് ഇവർ ബിൻഷയ്ക്ക് കൂടുതൽ ഫോണുകൾ ചെയ്തത്. ടിക്കറ്റ് എക്സാമിനർ ചമഞ്ഞ് തൊഴിൽതട്ടിപ്പു നടത്താൻ ബിൻഷയ്ക്ക് ഉപദേശം നൽകിയതും അവരെ പ്രേരിപ്പിച്ചതും കോട്ടയത്തെ മാഡമാണെന്നാണ് പൊലിസ് പറയുന്നത്. ബിൻഷ മറ്റുള്ളവരിൽ നിന്നും ജോലി വാഗ്ദാനം ചെയ്തുവാങ്ങിയ പണത്തിന്റെ ഒരുഭാഗംഇവർക്ക് ഗൂഗിൾപേയായി അയച്ചുകൊടുത്തതായും തെളിഞ്ഞിട്ടുണ്ട്. ഈസാഹചര്യത്തിലാണ് അന്വേഷണം കോട്ടയത്തേക്ക് പൊലിസ് വ്യാപിപ്പിക്കുന്നത്. അഞ്ചു തൊഴിലന്വേഷകരിൽ നിന്നും ലക്ഷങ്ങൾ തട്ടിയ ബിൻഷയെ കഴിഞ്ഞ ദിവസം കണ്ണൂർ കോടതി റിമാൻഡ് ചെയ്തിരുന്നു. കണ്ണൂർ സ്പോർട്സ് സ്‌കൂളിൽ പഠനം കഴിഞ്ഞിറങ്ങിയ ബിൻഷ മികച്ച ബാസ്‌കറ്റ് ബോൾ കളിക്കാരിയാണ്.

സംസ്ഥാനതലത്തിൽ ഇവർ കളിച്ചിട്ടുണ്ട്. കളിമികവിന്റെ അടിസ്ഥാനത്തിലാണ് ഇവർക്ക് റെയിൽവേയിൽ താൽക്കാലിക ജോലി ലഭിച്ചത്. എന്നാൽ കോവിഡ് കാലത്തെ കൂട്ടപിരിച്ചുവിടലിൽ ബിൻഷയ്ക്കു ജോലി നഷ്ടപ്പെടുകയായിരുന്നു. ഇതിനിടെ ഒരു സമ്പന്ന കുടുംബത്തിൽ നിന്ന് റെയിൽവേ സ്ഥിരം ജീവനക്കാരിയാണെന്ന് പറഞ്ഞ് ഇവർ വിവാഹം ചെയ്തിരുന്നു. തന്റെ കുടുംബജീവിതം തകരുമെന്നതിനാൽ ഈക്കാര്യം ഭർത്താവിനോട് പറയാൻ ഭയമായിരുന്നുവെന്നാണ് ഇവർ പൊലിസിന് നൽകിയ മൊഴി. അതുകൊണ്ടു തന്നെ ഇവർ ജോലിയിൽ തുടരുന്നുവെന്ന് നടിക്കുകയായിരുന്നു. ജോലി സൗകര്യാർത്ഥം കണ്ണൂർ നഗരത്തിനടുത്ത് ഒരു വാടകവീടെടുത്ത് ഭർത്താവും കുഞ്ഞും ബിൻഷയും താമസിച്ചു വരികയായിരുന്നു. എന്നും രാവിലെ ഭർത്താവാണ് ഇവരെ കാറിൽ റെയിൽവേ സ്റ്റേഷനിൽ കൊണ്ടുവിടാറുള്ളത്. അവിടെ നിന്നും ഇവർ പലട്രെയിനുകളിൽ കയറുകയും പകൽമുഴുവൻ ചുറ്റിക്കറങ്ങിയതിനു ശേഷം തിരിച്ചെത്തുകയുമാണ് പതിവ്.

ഇതിനിടെയാണ് ഒരു ദിവസം റെയിൽവേയിൽ ഉന്നതപിടിപാടുണ്ടെന്നും ആർക്കും ജോലി തനിക്ക് ശരിയാക്കി കൊടുക്കാൻ കഴിയുമെന്ന് അവകാശപ്പെട്ട മാഡത്തെ യാദൃശ്ചികമായി ട്രെയിനിൽ നിന്നും പരിചയപ്പെട്ടത്. തനിക്ക് റെയിൽവെയിൽ ജോലിയില്ലെന്നും അതു നഷ്ടപ്പെട്ടിരിക്കുകയാണെന്നും പറഞ്ഞ ബിൻഷയെ ആളുകളെ പണം വാങ്ങി റിക്രൂട്ട് ചെയ്തുതരാൻ ആവശ്യപ്പെട്ടത് കോട്ടയത്തെ മാഡമാണ്. ഇതുവിശ്വസിച്ചു കൊണ്ടാണ് ബിൻഷ പരിചയക്കാരെ ഉൾപ്പെടെ ഇവർക്ക് ഫോണിൽ പരിചയപ്പെടുത്തി കൊടുത്തത്. ഇതിനിടെ താൻ ജോലി വാങ്ങിക്കൊടുത്തുന്നുവെന്ന് അവകാശപ്പെട്ട് ചിലരെ മാഡം വിവിധ റെയിൽവേസ്റ്റേഷനുകളിൽ നിന്നും അവരറിയാതെ ബിൻഷയ്ക്ക് ചൂണ്ടിക്കാണിച്ചു കൊടുത്തിരുന്നു.

തനിക്ക് ജോലിയില്ലാത്ത കാര്യം ഭർത്താവിനോട് പറയാതിരുന്ന ബിൻഷ ഒടുവിൽ മാന്യമായി ജീവിക്കാനുള്ള പണം ഇവരിൽ നിന്നും കിട്ടുമെന്ന് തോന്നി കോട്ടയംമാഡത്തിന്റെ വലയിൽ വീഴുകയായിരുന്നു. റെയിൽവേയിൽ ടി.ടി. ആർ, ക്ലർക്ക് തുടങ്ങിയ തസ്തികകളിലേക്കാണ് നിയമനത്തിനായി ഇവർപണംവാങ്ങിയത്. ഇതിൽ തന്റെ കമ്മിഷനെടുത്ത് ഭൂരിഭാഗവും കോട്ടയംമാഡത്തിന് കൈമാറിയിരുന്നുവെന്നാണ് ഇവർ പറയുന്നത്. എന്നാൽ മാഡം തട്ടിപ്പുകാരിയാണെന്ന് ആർക്കും തൊഴിൽ കിട്ടാതായതോടെ ബിൻഷയ്ക്കു മനസിലാവുകയും ഇവർ നിൽക്കക്കള്ളിയില്ലാതെ മുങ്ങുകയുമായിരുന്നു.

ഇതിനിടെയിൽ പണം വാങ്ങിയവരിൽ ചിലർ ഇവരെ റെയിൽവേ സ്റ്റേഷനിൽ നിന്നും പിടികൂടി ചോദ്യം ചെയ്യുകയും തട്ടിപ്പുവിവരം പൊലിസിലും ബിൻഷയുടെ ബന്ധുക്കളെയും അറിയിക്കുമെന്ന് ഭീഷണിപ്പെടുത്തുകയുമായിരുന്നു. ഇതുകാരണം എന്തുചെയ്യണമെന്നറിയാതെ പ്രതിസന്ധിയിലായ ബിൻഷ മുങ്ങുകയായിരുന്നു. ഇതിനിടെയാണ് ഇവരെ കാണാതായെന്ന പരാതി ഭർത്താവ് നൽകിയതിനെ തുടർന്ന് സി. ആർ. പി. എഫ് കസ്റ്റഡിയിലെടുത്ത് കണ്ണൂർ ടൗൺ പൊലിസിന് കൈമാറുന്നത്.ചക്കരക്കൽ പള്ളിപൊയിൽ സ്വദേശിനിയായ തൊഴിലന്വേഷക നൽകിയ പരാതിയിലാണ് ടൗൺ പൊലിസ് ഇവരെ അറസ്റ്റു ചെയ്യുന്നത്.

അനീഷ് കുമാര്‍

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍