കണ്ണൂർ: കാട്ടാമ്പള്ളിയിൽ എക്‌സൈസ് ഓണം ഡ്രൈവിന്റെ ഭാഗമായി നടത്തിയ പരിശോധനയിൽ ഒന്നര ക്വിന്റർ നിരോധിത പുകയില ഉൽപ്പന്നങ്ങൾ പിടിച്ചെടുത്തു. കാട്ടാമ്പള്ളി പാലത്തിന് സമീപത്തുവച്ചാണ് കഴിഞ്ഞ ദിവസം വൈകുന്നേരം 140 കിലോഗ്രാം നിരോധിത പുകയില ഉൽപ്പന്നങ്ങൾ പിടിച്ചെടുത്തത്.

ഇവിടെ ക്വാർട്ടേഴ്സിൽ താമസിക്കുന്ന ജെ.എൻ.സയ്യിദിനെ(47) കോട്പ നിയമപ്രകാരം അറസ്റ്റ് ചെയ്തു. ഡെപ്യൂട്ടി എക്സൈസ് കമ്മീഷണറുടെ നിർദ്ദേശപ്രകാരം പാപ്പിനിശ്ശേരി റെയിഞ്ച് പരിധിയിൽപ്പെട്ട സ്‌കൂളുകളുടെയും, കോളേജുകളുടെയും പരിസരത്തുള്ള കടകളും സ്ഥിരമായി വൻതോതിൽ പുകയില ഉൽപ്പന്നങ്ങൾ കടത്തുന്നവരെയും നിരീക്ഷിക്കുന്നതിന്റെ ഭാഗമായിട്ടാണ് പരിശോധന നടന്നത്.

പാപ്പിനിശ്ശേരി റെയിഞ്ച് എക്സൈസ് ഇൻസ്പെക്ടർ എ ഹേമന്ത് കുമാറും സംഘവുമാണ് പരിശോധന നടത്തിയത്. പ്രിവന്റീവ് ഓഫീസർമാരായ ടി.സന്തോഷ്, ആർ.പി.അബ്ദുൾ നാസർ, ടി.ബഷീർ, സിവിൽ എക്സൈസ് ഓഫീസർമാരായ വി.നിഷാദ്, എം.എം.ഷഫീക്ക് എന്നിവരും പരിശോധനയിൽ പങ്കെടുത്തു.