പത്തനംതിട്ട: യുവതിയെ  കടന്നു പിടിച്ചുവെന്ന പരാതിയിൽ സിവിൽ പൊലീസ് ഓഫീസർക്ക് സസ്പെൻഷൻ. ആറന്മുള പൊലീസ് സ്റ്റേഷനിലെ സിപിഓ സജീഫ് ഖാനെയായാണ് ജില്ലാ പൊലീസ് മേധാവി സ്വപ്നിൽ മധുകർ മഹാജൻ സസ്പെൻഡ് ചെയ്തത്. നാർക്കോട്ടിക് സെൽ ഡിവൈ.എസ്‌പി കെ.എ. വിദ്യാധരൻ, പത്തനംതിട്ട ഡിവൈ.എസ്‌പി എസ്. നന്ദകുമാർ എന്നിവരുടെ അന്വേഷണ റിപ്പോർട്ടിന്റെ അടിസ്ഥാനത്തിൽ ഇന്നലെ രാത്രിയാണ് സസ്പെൻഷൻ ഉത്തരവ് വന്നത്.

മൂന്നു ദിവസം മുൻപാണ് സംഭവം. യുവതിയെ സ്റ്റേഷന്റെ അടുക്കളയിൽ വച്ച് സജീഫ് ഖാൻ കടന്നു പിടിച്ചുവെന്നാണ് പരാതി. യുവതി ഇക്കാര്യം സ്റ്റേഷനിൽ അറിയിച്ചു. തുടർന്ന് പരാതി നൽകാതെ പ്രശ്നം ഒത്തു തീർപ്പാക്കാൻ ശ്രമം നടന്നു. വിവരം അറിഞ്ഞ പത്തനംതിട്ട ഡിവൈ.എസ്‌പി യുവതിയെ കൗൺസിലിങ്ങിന് വിട്ടു. തുടർന്നാണ് യുവതി നടന്ന സംഭവങ്ങൾ പറഞ്ഞത്. 

ഇതിന് പിന്നാലെ യുവതിയുടെ മൊഴി പത്തനംതിട്ട വനിതാ പൊലീസ് സ്റ്റേഷനിൽ രേഖപ്പെടുത്തി. പൊലീസ് ഇൻസ്പെക്ടർ ലീലാമ്മയുടെ നിർദ്ദേശ പ്രകാരം എഫ്ഐആർ രജിസ്റ്റർ ചെയ്തു. ഇതു സംബന്ധിച്ച് അന്വേഷിച്ച് റിപ്പോർട്ട് സമർപ്പിക്കാൻ എസ്‌പി, ഡിവൈ.എസ്‌പിമാരെ ചുമതലപ്പെടുത്തുകയായിരുന്നു. ഇന്നലെ വൈകിട്ടാണ് റിപ്പോർട്ട് സമർപ്പിച്ചത്.

രാത്രി തന്നെ സജീഫ് ഖാനെ സസ്പെൻഡ് ചെയ്യുകയും ചെയ്തു. ഇയാൾ പത്തനംതിട്ടയിലെ പൊലീസ് ക്വാർട്ടേഴ്സിലാണ് താമസിക്കുന്നത്.

ശ്രീലാല്‍ വാസുദേവന്‍

    ശ്രീലാല്‍ വാസുദേവന്‍ മറുനാടന്‍ മലയാളി പത്തനംതിട്ട ന്യൂസ് കോണ്‍ട്രിബ്യൂട്ടര്‍