വിധി അന്തിമമല്ല, ഇത് അവസാന പോരാട്ടവുമല്ല! ഗൂഢാലോചന തെളിയിക്കുക എപ്പോഴും വെല്ലുവിളിയാണ്; പ്രോസിക്യൂഷനും അന്വേഷണ സംഘവും മികച്ച രീതിയില് പോരാടി; ഗൂഢാലോചനയുടെ കാര്യത്തില് മാത്രമാണ് കോടതിക്ക് ഭിന്നാഭിപ്രായം; വിചാരണ കോടതി വിധിയില് മറുനാടനോട് ബി.സന്ധ്യ
വിചാരണ കോടതി വിധിയില് മറുനാടനോട് ബി.സന്ധ്യ
തിരുവനന്തപുരം: നടിയെ ആക്രമിച്ച കേസില് എട്ടാം പ്രതിയായിരുന്ന ദിലീപിനെ കുറ്റവിമുക്തനാക്കിയ വിചാരണ കോടതിയുടെ വിധി വന്നതിന് പിന്നാലെ കേരളം ഉറ്റുനോക്കിയ ഒരു പ്രതികരണമുണ്ട്. അത് അന്വേഷണ സംഘത്തിന്റെ തലപ്പത്തുണ്ടായിരുന്ന ബി. സന്ധ്യയുടേതാണ്. മറുനാടന് എക്സ്ക്ലൂസീവിന് നല്കിയ പ്രതികരണത്തില്, വരാനിരിക്കുന്ന നിയമപോരാട്ടത്തിന്റെ സൂചനകളാണ് സന്ധ്യ നല്കുന്നത്.
'ഗൂഢാലോചന തെളിയിക്കല് എളുപ്പമല്ല'
ഈ കേസിലെ ഏറ്റവും വലിയ വെല്ലുവിളി ഗൂഢാലോചന തെളിയിക്കുക എന്നതായിരുന്നുവെന്ന് ബി. സന്ധ്യ തുറന്നുസമ്മതിക്കുന്നു. 'ഗൂഢാലോചന എപ്പോഴും ഒരു വെല്ലുവിളിയാണ്' എന്ന് പറഞ്ഞ അവര്, അത് പ്രായോഗികമായി തെളിയിക്കാന് പ്രയാസകരമായ ഒന്നാണെന്നും കൂട്ടിച്ചേര്ത്തു. .
വിചാരണ കോടതിയുടെ ഈ വിധി കേസിലെ അവസാന വാക്കാണെന്ന് ബി. സന്ധ്യ കരുതുന്നില്ല. 'തീര്ച്ചയായും ഇത് അന്തിമവിധിയല്ല, മേല്ക്കോടതികള് മുന്നിലുണ്ട്' എന്ന് അവര് അസന്ദിഗ്ദ്ധമായി വ്യക്തമാക്കി. ഇരയ്ക്കൊപ്പം അന്വേഷണ സംഘവും പ്രോസിക്യൂഷനും അവസാന നിമിഷം വരെ ഉണ്ടാകുമെന്നും നീതിക്ക് വേണ്ടിയുള്ള പോരാട്ടം തുടരുമെന്നും സന്ധ്യ ഉറപ്പിച്ചു പറയുന്നു. ദിലീപിനെതിരെ ഹൈക്കോടതിയെ സമീപിക്കാന് പോലീസ് തയ്യാറെടുക്കുന്നതിനിടെയാണ് സന്ധ്യയുടെ പ്രതികരണം.
അന്വേഷണ ഉദ്യോഗസ്ഥരെയും പ്രോസിക്യൂഷനെയും ബി. സന്ധ്യ പൂര്ണ്ണമായും പിന്തുണച്ചു. വിചാരണ വേളയില് പ്രോസിക്യൂഷന് മികച്ച രീതിയില് പോരാടിയെന്നും അന്വേഷണ ഉദ്യോഗസ്ഥര് അഭിനന്ദനം അര്ഹിക്കുന്നുവെന്നും അവര് പറഞ്ഞു. ടീം വര്ക്കില് ഒരു പിഴവും സംഭവിച്ചിട്ടില്ലെന്നാണ് അവരുടെ പക്ഷം.
യഥാര്ത്ഥ പ്രതികള് കുടുങ്ങി, പക്ഷേ...
കുറ്റകൃത്യത്തില് നേരിട്ട് പങ്കെടുത്ത പ്രതികള് കുറ്റം ചെയ്തുവെന്ന് തെളിയിക്കപ്പെട്ടിട്ടുണ്ടെന്ന് അവര് ഓര്മ്മിപ്പിച്ചു. ഗൂഢാലോചനയുടെ കാര്യത്തില് മാത്രമാണ് കോടതിക്ക് വിഭിന്നമായ അഭിപ്രായമുണ്ടായിരിക്കുന്നത്. ഇത് പോലീസിന്റെ അന്വേഷണത്തില് വീഴ്ച പറ്റിയിട്ടില്ലെന്ന് ബോധ്യപ്പെടുത്താനാണ് അവര് ശ്രമിക്കുന്നത്.
സിനിമാ ലോകത്തെ 'ശുദ്ധീകരണം'
ഈ കേസ് സിനിമാ മേഖലയില് വലിയ പോസിറ്റീവ് മാറ്റങ്ങള്ക്ക് വഴിവെച്ചതായും സന്ധ്യ വിശ്വസിക്കുന്നു. സെറ്റുകളിലെ സുരക്ഷിതത്വവും ബോധവല്ക്കരണവും വര്ദ്ധിച്ചുവെന്നത് കേസന്വേഷണത്തിന്റെ ഒരു വിജയമായി അവര് ചൂണ്ടിക്കാട്ടി.
ദിലീപിന്റെ കുറ്റവിമുക്തി ഒരു താല്ക്കാലികാശ്വാസം മാത്രമാണെന്നും, നിയമയുദ്ധം തുടരുമെന്നും തന്നെയാണ് ബി. സന്ധ്യയുടെ വാക്കുകള് നല്കുന്ന സൂചന. കേസ് ഹൈക്കോടതിയിലേക്ക് നീങ്ങുമ്പോള് ഈ 'ഗൂഢാലോചന' എങ്ങനെയൊക്കെ വ്യാഖ്യാനിക്കപ്പെടും എന്നത് കേരളം ഉറ്റുനോക്കുന്നു. അതേസമയം, ബി.സന്ധ്യയ്ക്കും അന്വേഷണ സംഘത്തിനും എതിരെ ദിലീപ് ഗൂഢാലോചന ആരോപിച്ച് ദിലീപ് നിയമ നടപടിക്ക് മുതിരുമോ എന്നാണ് ഇനി കണ്ടറിയേണ്ടത്.
