ജനുവരി രണ്ടു മുതല്‍ യുകെയില്‍ സ്റ്റുഡന്റ് വിസയില്‍ എത്തണമെങ്കില്‍ ട്യൂഷന്‍ ഫീസിന് പുറമെ ഒന്‍പതു മാസം ജീവിക്കാനുള്ള ചെലവും ബാങ്ക് അക്കൗണ്ടില്‍ കാണിക്കണം: അറിഞ്ഞിരിക്കേണ്ട സ്റ്റുഡന്റ് വിസ നിയമത്തിലെ മാറ്റങ്ങള്‍

ലണ്ടന്‍: പുതു വര്‍ഷം പിറക്കുന്നതോടെ യു കെയിലെ സ്റ്റുഡന്റ് വിസ ചട്ടങ്ങളിലും കാതലായ മാറ്റങ്ങള്‍ വരികയാണ്. 2025 ജനുവരി 2 മുതലാണ് പുതിയ നിയമങ്ങള്‍ പ്രാബല്യത്തില്‍ വരിക. ഇതനുസരിച്ച് കൂടുതല്‍ പണം സ്വന്തം ചിലവിലേക്കായി ബാങ്ക് അക്കൗണ്ടില്‍ കരുതേണ്ടി വരും. മറ്റൊരു വിധത്തില്‍ പറഞ്ഞാല്‍, വരുന്ന വര്‍ഷം മുതല്‍ യുകെയിലെ പഠനം ചെലവേറിയ ഒന്നായി മാറും എന്നര്‍ത്ഥം.

ലണ്ടനിലാണ് നിങ്ങള്‍ പഠിക്കുന്നതെങ്കില്‍, പ്രതിമാസം 1,450 പൗണ്ട് വീതവും യു കെയുടെ മറ്റേതെങ്കിലും ഭാഗത്താണെങ്കില്‍ പ്രതിമാസം 1,125 പൗണ്ട് വീതവും ചെലവിനുള്ള തുക (ഒന്‍പത് മാസത്തേക്കുള്ളത്) ബാങ്ക് അക്കൗണ്ടില്‍ ഉണ്ടെങ്കില്‍ മാത്രമെ വിസ ലഭിക്കുകയുള്ളു. നിലവില്‍, ലണ്ടനിലേക്ക് വരുന്നവര്‍ക്ക് പ്രതിമാസം 1,334 പൗണ്ടും രാജ്യത്തിന്റെ മറ്റിടങ്ങളില്‍ 1,023 പൗണ്ടും ആണ് കരുതേണ്ടത്.

അതായത്, പഠന സമയത്തെ ചെലവിനുള്ള തുക കൂടി ഇനിമുതല്‍ ട്യൂഷന്‍ ഫീസിന് പുറമെ ബാങ്ക് അക്കൗണ്ടില്‍ കാണിക്കേണ്ടതായി വരും. ഉയരുന്ന ജീവിത ചെലവുകള്‍ക്ക് പുറമെ, സ്റ്റുഡന്റ് വിസ സൗകര്യം ദുരുപയോഗം ചെയ്ത് ബ്രിട്ടനില്‍ കുടിയേറ്റത്തിനുള്ള ശ്രമങ്ങള്‍ തടയുക എന്നതുകൂടി ഈ പുതിയ നിയമ രൂപീകരണത്തിന് പുറകിലുണ്ട്. അതിനോടൊപ്പം, ബ്രിട്ടനില്‍ താമസിക്കുന്നതിന് വിദേശ വിദ്യാര്‍ത്ഥികള്‍ പൂര്‍ണ്ണമായും സജ്ജരാണെന്ന ഉറപ്പു കൂടി ഇതുവഴി ലഭിക്കും.

ബ്രിട്ടീഷുകാരായ വിദ്യാര്‍ത്ഥികള്‍ക്കുള്ള മെയിന്റനന്‍സ് ലോണുകളുമായി ഒത്തു പോകുന്നതാണ് ഈ പുതിയ നിബന്ധനകള്‍. എന്നാല്‍, പുതിയ നിയമം പാവപ്പെട്ട വിദേശ വിദ്യാര്‍ത്ഥികള്‍ക്ക് ബ്രിട്ടനില്‍ വിദ്യാഭ്യാസം നിഷേധിക്കും എന്നാണ് ചില വിമര്‍ശകര്‍ പറയുന്നത്, പ്രത്യേകിച്ചും ദരിദ്ര രാഷ്ട്രങ്ങളില്‍ നിന്നുള്ളവര്‍ക്ക്.

16 വയസ്സു കഴിഞ്ഞ ആര്‍ക്കും യു കെയിലേക്ക് സ്റ്റുഡന്റ് വിസയ്ക്കായി അപേക്ഷിക്കാം. എന്നാല്‍, ഇതിനായി ഒരു ലൈസന്‍സ് ഉള്ള സ്‌പോണ്‍സര്‍ നല്‍കുന്ന കോഴ്സില്‍ പ്രവേശനം ലഭിച്ചിരിക്കണം. മാത്രമല്ല, ഇംഗ്ലീഷ് എഴുതുവാനും , വായിക്കുവാനും, സംസാരിക്കാനും അറിഞ്ഞിരിക്കണം. കോഴ്സ് ആരംഭിക്കുന്നതിന് ആറ് മാസം മുന്‍പ് മുതല്‍ നിങ്ങള്‍ക്ക് വിസയ്ക്കായി അപേക്ഷിക്കാം. യു കെയില്‍ നിന്നു തന്നെയാണ് അപേക്ഷിക്കുന്നതെങ്കില്‍ 3 മാസം മുന്‍പ് മുതല്‍ അപേക്ഷിക്കാന്‍ കഴിയും. ഈ വിസ, കോഴ്സിന്റെ കാലാവധി തീരുന്നത് വരെ ആയിരിക്കും സാധുവാകുക. 490 പൗണ്ട് ആണ് അപേക്ഷ ഫീസ്.