ന്യൂഡൽഹി: കോൺഗ്രസിന്റെ സംഘടനാ ചുമതലയുള്ള ജനറൽ സെക്രട്ടറിയും ആലപ്പുഴ എംപിയുമായ കെ.സി. വേണുഗോപാലിന് രാഹുൽ ഗാന്ധിയുടെ വക കാർ സമ്മാനം. താൻ ഉപയോഗിച്ചിരുന്ന ടൊയോട്ട ഇന്നോവ ക്രിസ്റ്റ കാറാണ് രാഹുൽ ഗാന്ധി കെ.സി. വേണുഗോപാലിന് നൽകിയത്. ഈ കാറിലാണ് ലോക്സഭാ സമ്മേളനത്തിന്റെ ആദ്യദിവസം കെ.സി. വേണുഗോപാൽ പാർലമെന്റിലെത്തിയത്.

പാർട്ടി നടത്തിയ ക്രമീകരണം മാത്രമാണ് ഇതെന്ന് കെ.സി. വേണുഗോപാൽ പ്രതികരിച്ചു. എ.ഐ.സി.സി. നൽകിയ കാറാണ് ഇന്നോവ ക്രിസ്റ്റ. രാഹുൽ ഗാന്ധിയുടെ കാറ് മാറ്റി. മുമ്പ് ഉപയോഗിച്ച കാർ അദ്ദേഹം എ.ഐ.സി.സിക്ക് വിട്ടുനൽകി. അത് പാർട്ടിയുടെ ആവശ്യങ്ങൾക്കായി താൻ ഉപയോഗിക്കുന്നുവെന്നേ ഉള്ളൂവെന്നും കെ.സി. വേണുഗോപാൽ പറഞ്ഞു. ടൊയോട്ടയുടെതന്നെ എത്തിയോസ് എന്ന കാറാണ് നേരത്തേ കെ.സി. വേണുഗോപാൽ ഉപയോഗിച്ചിരുന്നത്.