നിന്റെ ഭർത്താവ് ജീവിച്ചിരിപ്പുണ്ടോ? നെറ്റിയിൽ സിന്ദൂരമില്ലാത്തതിന് സ്ത്രീയ്ക്ക് നേരെ ഭീഷണിയുമായി ബിജെപി എംപി

ബംഗളൂരു: നെറ്റിയിൽ സിന്ദൂരം അണിയാത്തതിന് ശകാരവുമായി കർണാടക ബിജെപി എം പി എസ് മുനിസ്വാമി. മാർച്ച് 8 വനിതാ ദിനത്തോടനുബന്ധിച്ച് നടന്ന പ്രദർശന - വിൽപന മേള ഉദ്ഘാടനം ചെയ്യാൻ എത്തിയതായിരുന്നു എം പി. കർണാടകയിലെ കോലാർ ജില്ലയിൽ നിന്നുള്ള ബിജെപി എംപിയാണ് എസ് മുനിസ്വാമി.

''ആദ്യം ഒരു സിന്ദൂരം അണിയൂ...നിങ്ങളുടെ ഭർത്താവ് ജീവിച്ചിരിപ്പുണ്ടോ ? നിങ്ങൾക്ക് സാമാന്യബുദ്ധി ഇല്ല,'' എന്നാണ് എംപി കച്ചവടക്കാരിയോട് പറയുന്നത്. വേദിക്കരികിലുള്ള കടയിൽ തുണിക്കച്ചവടം നടത്തുന്ന സ്ത്രീയോടാണ് എംപിയുടെ ആക്രോശം. എംപി യുവതിയെ ശകാരിക്കുന്ന വീഡിയോയും സോഷ്യൽ മീഡിയയിൽ പ്രചരിക്കുന്നുണ്ട്. അതേസമയം, ഇത്തരം സംഭവങ്ങൾ ബിജെപിയുടെ സംസ്‌കാരത്തെ പ്രതിഫലിപ്പിക്കുന്നതാണെന്ന് കോൺഗ്രസ് അപലപിച്ചു.