പഴം നല്‍കിയതിന് ശേഷം തുടര്‍ച്ചയായി സെല്‍ഫി, ഇഷ്ടപ്പെടാതിരുന്ന ആന തുമ്പികൈ കൊണ്ട് അടിച്ച് വീഴ്ത്തി ചവിട്ടി കൊന്നു; പാപ്പാനും ബന്ധുവിനും ദാരുണാന്ത്യം
ചെന്നൈ: തിരുച്ചെന്തൂരിലെ മുരുകന്‍ ക്ഷേത്രത്തിലെ അന്നദാനത്തിനിടെ ആനയുടെ ആക്രമണത്തില്‍ രണ്ട് പേര്‍ മരിച്ചത് സെല്‍ഫി എടുക്കുന്നതിനിടെ. തുടര്‍ച്ചയായി സെല്‍ഫി എടുത്ത ശിശുപാലനെയും പാപ്പാനായ ഉദയകുമാറിനെയും ആന തുമ്പികൈ കൊണ്ട് അടിച്ച് വീഴ്ത്തി ചവിട്ടിക്കൊല്ലുകയായിരുന്നു.
ക്ഷേത്രത്തിലെ പിടിയാനയായ ദേവയാനിയുടെ ആക്രമണത്തില്‍ പാപ്പാന്‍ ഉദയകുമാറും (45) ബന്ധു ശിശുപാലനുമാണു (55) മരിച്ചത്. പഴവുമായി അടുത്തെത്തിയ ശിശുപാലന്‍, ആനയ്ക്കു പഴം നല്‍കിയ ശേഷം തുടര്‍ച്ചയായി സെല്‍ഫി എടുത്തു. ഇത് ഇഷ്ടപ്പെടാതിരുന്ന ആന ആക്രമിക്കുകയായിരുന്നു. കന്യാകുമാരി ജില്ലയിലെ പളുകല്‍ സ്വദേശിയായ ശിശുപാലന്‍ വിമുക്ത ഭടനാണ്.
ശിശുപാലന്റെ നിലവിളി കേട്ട് രക്ഷിക്കാനെത്തിയ ഉദയകുമാറിനെയും ആന അടിച്ചുവീഴ്ത്തി ചവിട്ടി. ഇരുവരെയും ഉടന്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. കൊല്ലപ്പെട്ട ഉദയകുമാര്‍ വര്‍ഷങ്ങളായി തിരുച്ചന്തൂരിലാണു താമസിക്കുന്നത്. മരിച്ച ശിശുപാലന്റെ അടുത്ത ബന്ധുവാണ് ഉദയകുമാര്‍. ഉദയകുമാറിനെ കാണാനാണു ശിശുപാലന്‍ തിരുച്ചെന്തൂരിലേക്കു പുറപ്പെട്ടത്.
