ഝാര്‍ഖണ്ഡില്‍ മൂന്ന് മാവോയിസ്റ്റുകളെ സുരക്ഷാസേന വധിച്ചു; കൊല്ലപ്പെട്ടവരില്‍ തലയ്ക്ക് ഒരു കോടി രൂപ വിലയിട്ട മാവോയിസ്റ്റ് തലവനും; വധിച്ചത് ഇന്ന് രാവിലെ നടന്ന ഏറ്റുമുട്ടലില്‍
റാഞ്ചി: ഝാര്‍ഖണ്ഡിലെ ഹസാരിബാഗ് ജില്ലയില്‍ സുരക്ഷാസേന നടത്തിയ വന്‍ തിരച്ചിലില്‍ മൂന്ന് മാവോയിസ്റ്റുകള്‍ വധിക്കപ്പെട്ടു. വധിക്കപ്പെട്ടവരില്‍ തലയ്ക്ക് ഒരു കോടി രൂപ വിലയിട്ട കമ്മ്യൂണിസ്റ്റ് പാര്‍ട്ടി ഓഫ് ഇന്ത്യ (മാവോയിസ്റ്റ്) കേന്ദ്ര കമ്മിറ്റി അംഗമായ സഹദേവ് സോറനും ഉള്‍പ്പെടുന്നു. മറ്റു രണ്ട് പേരെ രഘുനാഥ് ഹെംബ്രാം, ബിര്‍സെന്‍ ഗഞ്ചു എന്നിങ്ങനെയാണ് തിരിച്ചറിഞ്ഞത്.
ഗോര്‍ഹര്‍ പൊലീസ് സ്റ്റേഷന്‍ പരിധിയിലെ പന്‍തിത്രി വനമേഖലയിലാണ് ഇന്ന് രാവിലെ ആറ് മണിയോടെ ഏറ്റുമുട്ടല്‍ ഉണ്ടായത്. രഹസ്യവിവരത്തെ തുടര്‍ന്നാണ് സുരക്ഷാസേന സംയുക്ത ഓപ്പറേഷന്‍ നടത്തിയത്. ഏറ്റുമുട്ടലിന് പിന്നാലെ സ്ഥലത്ത് നടത്തിയ തിരച്ചിലില്‍ മൂന്ന് പേരുടെയും മൃതദേഹങ്ങള്‍ വീണ്ടെടുത്തു. സ്ഥലത്ത് നിന്ന് ആയുധങ്ങളും വെടിയുണ്ടകളും വലിയ തോതില്‍ കണ്ടെത്തിയതായും പൊലീസ് അറിയിച്ചു.
സഹദേവ് സോറന്‍ കിഴക്കന്‍ ഇന്ത്യയില്‍ മാവോയിസ്റ്റ് പ്രവര്‍ത്തനങ്ങള്‍ക്ക് നേതൃത്വം നല്‍കുന്ന പ്രധാന നേതാവായിരുന്നു. ഇയാളെ ഏറെക്കാലമായി പൊലീസ് തിരഞ്ഞു വരികയായിരുന്നു. കൊല്ലപ്പെട്ട മൂവരെയും കണ്ടെത്താന്‍ സര്‍ക്കാര്‍ പ്രഖ്യാപിച്ചിരുന്ന 25 ലക്ഷം രൂപ പാരിതോഷികം ഇപ്പോഴോടെ അസാധുവായി.
വനമേഖലയില്‍ കൂടുതല്‍ മാവോയിസ്റ്റ് സാന്നിധ്യം ഉണ്ടായേക്കാമെന്ന സൂചനയെത്തുടര്‍ന്ന് സുരക്ഷാസേന തിരച്ചില്‍ കര്‍ശനമാക്കിയിട്ടുണ്ട്. പരിസരപ്രദേശങ്ങളില്‍ അധിക സേനയെ വിന്യസിക്കുകയും സുരക്ഷ ശക്തമാക്കുകയും ചെയ്തതായി ഉദ്യോഗസ്ഥര്‍ അറിയിച്ചു.
