മംഗളൂരു: കർണാടകയിൽ കാർ മേൽപാലത്തിൽനിന്ന് താഴ്ചയിലേക്ക് വീണ് മലയാളി ദമ്പതികൾ മരിച്ചു. കണ്ണൂരിനടുത്ത ചൊക്ലി നിടുമ്പ്രം കാരാറത്ത് സ്‌കൂളിനടുത്ത അൽമർവയിൽ തൈപറമ്പത്ത് മുനവ്വർ (48), ഭാര്യ സമീറ (35) എന്നിവരാണ് മരിച്ചത്. സാരമായി പരിക്കേറ്റ മകൻ സഹലിനെ (19) മണിപ്പാൽ കെ.എം.സി ആശുപത്രിയിൽ പ്രവേശിപ്പിച്ചു.

ചൊവ്വാഴ്ച ഉച്ചക്ക് രണ്ടു മണിയോടെ ഉഡുപ്പി ജില്ലയിലെ കുന്താപുരം ബോബ്ബർയനക്കട്ടയിലായിരുന്നു അപകടം. മുനവ്വറായിരുന്നു കാർ ഓടിച്ചത്. സമീറ സംഭവസ്ഥലത്ത് തന്നെ മരിച്ചു. മുനവ്വർ ബുധനാഴ്ച ഉച്ചയോടെ ആശുപത്രിയിലാണ് മരിച്ചത്.

മഹാരാഷ്ട്ര സാംഗ്ലിയിലെ മീരേജിൽ വിദ്യാർത്ഥിയായ സഹലിനൊപ്പം പെരുന്നാൾ ആഘോഷിക്കാൻ നാട്ടിലേക്ക് വരുമ്പോഴായിരുന്നു അപകടം. മീറേജിൽ ബോംബെ സ്റ്റാർ ബേക്കറിയുടമയാണ് മുനവ്വർ. കോയമ്പത്തൂരിൽ വിദ്യാർത്ഥിനിയായ മിനാ ഫാത്തിമ മകളാണ്. പോസ്റ്റ്‌മോർട്ടത്തിന് ശേഷം ബന്ധുക്കൾ ഏറ്റുവാങ്ങിയ മൃതദേഹങ്ങൾ നാട്ടിൽ കൊണ്ടുപോയി ഖബറടക്കി.

പരേതരായ ദയരോത്ത് ഹംസയുടെയും തൈപ്പറവത്ത് ആസ്യയുടെയും മകനാണ് മുനവ്വർ. തലശ്ശേരി സൈദാർപള്ളി അബ്ദുല്ലാസിൽ ചെറിയാണ്ടി അബ്ദുല്ലയുടെയും കൈതാൽ ഹാജറയുടെയും മകളാണ് സമീറ.