ഭാര്യയെ ശല്യപ്പെടുത്തിയ കൗമാരക്കാരനെ ഭർത്താവ് കൊലപ്പെടുത്തി; മൃതദേഹം വെട്ടിമുറിച്ചു വികൃതമാക്കി; നടുക്കുന്ന സംഭവം മഹാരാഷ്ട്രയിൽ

മുംബൈ: ഭാര്യയെ ശല്യപ്പെടുത്തിയെന്നാരോപിച്ച് ഭർത്താവ് പതിനേഴുകാരനെ കൊലപ്പെടുത്തി. മഹാരാഷ്ട്രയിലാണ് സംഭവം. ഈശ്വർ പുത്രൻ(17) ആണ് കൊല്ലപ്പെട്ടത്. സംഭവത്തിൽ, പ്രതി ഷഫീഖ് അഹമ്മദ് ഷെയ്ഖിനെ പൊലീസ് അറസ്റ്റ് ചെയ്തു. ഷഫീഖ് അഹമ്മദിന്റെ ഭാര്യാപിതാവിന്റെ വളർത്തുമകനാണ് ഈശ്വർ.

ഷഫീഖിന്റെ ഭാര്യ, ഈശ്വറിനെ സഹോദരനായാണ് കണ്ടിരുന്നത്. എന്നാൽ ഇവർ തമ്മിൽ രക്തബന്ധമില്ല. ഈശ്വർ യുവതിയെ പലവട്ടം ശല്യപ്പെടുത്തിയെന്നാണ് ആരോപണം. ഷഫീഖ് നിരവധി തവണ മുന്നറിയിപ്പ് നൽകിയെങ്കിലും ഈശ്വർ പിന്മാറിയില്ല. ഇതോടെയാണ് ക്രൂരകൃത്യം നടപ്പിലാക്കാൻ ഷഫീഖ് തീരുമാനിക്കുന്നത്.

തുടർന്ന്, മുംബൈയിലെ ചെമ്പൂരിൽ വച്ച് ഷഫീഖ്, ഈശ്വറിനെ കൊലപ്പെടുത്തിയ ശേഷം മൃദേഹം വെട്ടിനുറുക്കുകയായിരുന്നു. പല കഷ്ണങ്ങളായി മുറിച്ച മൃതദേഹം പിന്നീട് പ്രതി വീട്ടിലെ അടുക്കളയിൽ സൂക്ഷിച്ചു.

ഈശ്വറിനെ കാണാനില്ലെന്ന് ചൂണ്ടിക്കാണിച്ച് ഷഫീഖിന്റെ ഭാര്യാപിതാവ് പൊലീസിനെ വിവരം അറിയിച്ചതോടെയാണ് വിഷയം പുറംലോകമറിയുന്നത്. പിന്നീട്, ഷഫീഖിനെ കസ്റ്റഡിയിലെടുത്ത് ചോദ്യം ചെയ്തപ്പോൾ ഇയാൾ കൊലപാതകം നടത്തിയതായി സമ്മതിക്കുകയായിരുന്നു.