തെലങ്കാനയിൽ സിമന്റ് ഫാക്ടറിയിലെ ലിഫ്റ്റ് തകർന്ന് വീണ് അഞ്ചുപേർ മരിച്ചു; നിരവധി പേർക്ക് പരിക്ക്

ഹൈദരബാദ്: തെലങ്കാനയിലെ സിമന്റ് ഫാക്ടറിയിലെ ലിഫ്റ്റ് തകർന്ന് വീണ് അഞ്ചുപേർക്ക് ദാരുണാന്ത്യം. സൂര്യപേട്ട് ജില്ലയിലെ മേലചേരുവിലയിലാണ് അപകടം ഉണ്ടായത്. നിരവധി പേർക്ക് പരിക്കേൽക്കുകയും ചെയ്തു. കുടുങ്ങിക്കിടക്കുന്നവരെ രക്ഷപ്പെടുത്താനുള്ള ശ്രമം തുടരുകയാണ്. മരണസംഖ്യ ഉയരുമെന്നാണ് റിപ്പോർട്ടുകൾ.

സ്വകാര്യ സിമന്റ് ഫാക്ടറിയിലെ പുതിയ യൂണിറ്റിന്റെ നിർമ്മാണ പ്രവർത്തനങ്ങൾക്കിടെയാണ് ലിഫ്റ്റ് തകർന്നുവീണതെന്നാണ് റിപ്പോർട്ടുകൾ. ഇന്ന് ഉച്ചക്ക് രണ്ട് മണിയോടെയായിരുന്നു അപകടം. ഈ സമയത്ത് 20 ലേറെ തൊഴിലാളികൾ സ്ഥലത്തുണ്ടായിരുന്നു.ലിഫ്റ്റിലുള്ളവർ താഴേക്ക് വീഴുകയായിരുന്നു.

താഴെ നിർമ്മാണപ്രവർത്തനങ്ങളിൽ ഏർപ്പെട്ടിരിക്കുന്നവരുടെ ദേഹത്താണ് ലിഫ്റ്റ് തകർന്നുവീണത്. ഫാക്ടറിക്കുള്ളിൽ സുരക്ഷാ സേന പരിശോധന നടത്തുകയാണ്. ഉത്തർപ്രദേശ്, ബീഹാർ എന്നിവിടങ്ങളിലുള്ളവരാണ് അപകടത്തിൽപ്പെട്ടത്.