ബെംഗളൂരു: കർണാടകത്തിൽ അടുത്ത അധ്യായന വർഷത്തേക്കായി പുതിയ പാഠ്യപദ്ധതി തയ്യാറാക്കി കോൺഗ്രസ് നേതൃത്വത്തിലുള്ള സർക്കാർ. ഒന്ന് മുതൽ പത്തുവരെ ക്ലാസുകളിലേക്കുള്ള പാഠ്യപുസ്തകങ്ങളുടെ അന്തിമരൂപമാണ് പ്രിന്റിങ്ങിന് തയ്യാറായിരിക്കുന്നത്. കഴിഞ്ഞ ബിജെപി സർക്കാർ കൊണ്ടുവന്ന പാഠപുസ്തക പരിഷ്‌കരണങ്ങളിൽ പലതും ഒഴിവാക്കിയാണ് പുതിയ പാഠ്യപദ്ധതി ഒരുക്കിയിരിക്കുന്നത്.

ജനാധിപത്യം, ഭരണഘടനാ നിർദേശക തത്വങ്ങൾ, പൗരന്റെ കടമകൾ, പൗരന്റെ അവകാശങ്ങൾ എന്നിവയ്ക്ക് പ്രാധാന്യം നൽകിയാണ് പുതിയ പാഠപുസ്തകങ്ങൾ തയ്യാറാക്കിയിരിക്കുന്നത്. മാത്രമല്ല, വിവാദങ്ങൾ ഒഴിവാക്കുന്നതിന്റെ ഭാഗമായി ടിപ്പു സുൽത്താനെക്കുറിച്ച് പരാമർശിക്കുന്ന പാഠഭാഗങ്ങളും ഒഴിവാക്കിയിട്ടുണ്ട്.

രോഹിത് ചക്രതീർത്ഥയുടെ നേതൃത്വത്തിൽ ബിജെപി സർക്കാർ രൂപവത്കരിച്ച കമ്മിറ്റി കഴിഞ്ഞ സർക്കാരിന്റെ കാലത്ത് തയ്യാറാക്കിയ ഉള്ളടക്കങ്ങളിൽ കാര്യമായ മാറ്റങ്ങളോടെയാണ് പുതിയ പുസ്തകങ്ങൾ പുറത്തിറങ്ങുന്നത്. ഗിരീഷ് കർണാടിന്റെയും പെരിയാറുടേയും ദേവനൂർ മഹാദേവിന്റെയും പുസ്തകങ്ങൾ ഉൾക്കൊള്ളിച്ച പാഠഭാഗങ്ങൾ പഴയ കമ്മറ്റി ഒഴിവാക്കിയിരുന്നു. ഇവയെല്ലാം പുതിയ കമ്മറ്റി തിരിച്ചുകൊണ്ടുവന്നിട്ടുണ്ട്.

എട്ടാം ക്ലാസിലെ ചരിത്രപാഠപുസ്തകത്തിൽ സനാതന ധർമം എന്താണെന്ന് വ്യക്തമാക്കുന്ന പുതിയ പാഠഭാഗം ഉൾക്കൊള്ളിച്ചിട്ടുണ്ട്. ഇതുകൂടാതെ ജൈനിസവും ബുദ്ധിസവും പരിചയപ്പെടുത്തുന്ന പാഠങ്ങളും പുതുതായി ഉൾക്കൊള്ളിച്ചിട്ടുണ്ട്. ഈ പാഠങ്ങളിൽ 'ധർമം' എന്ന് പറയുന്ന ഭാഗങ്ങളിലെല്ലാം 'മതം' എന്നാണ് ഉപയോഗിച്ചിരിക്കുന്നത്.