ന്യൂഡൽഹി: എഴുത്തുകാരിയും സാമൂഹിക പ്രവർത്തകയുമായ സുധാ മൂർത്തി രാജ്യസഭ എംപിയായി സത്യപ്രതിജ്ഞ ചെയ്തു. ഭർത്താവും ഇൻഫോസിസ് കമ്പനി സഹസ്ഥാപകനുമായ എൻ.ആർ. നാരായണ മൂർത്തി ചടങ്ങിൽ സന്നിഹിതനായിരുന്നു. പ്രത്യേക ക്ഷണിതാവെന്ന നിലയിലാണ് നാരായണ മൂർത്തി എത്തിയത്.

രാജ്യസഭ ചെയർമാൻ ജഗ്ദീപ് ധൻഖർ ആണ് സത്യപ്രതിജ്ഞ ചൊല്ലിക്കൊടുത്തത്. രാജ്യസഭ നേതാവ് പീയുഷ് ഗോയലും ചടങ്ങിൽ പങ്കെടുത്തു. ഇൻഫോസിസ് ഫൗണ്ടേഷന്റെ മുൻ ചെയർപേഴ്‌സണായ സുധാ മൂർത്തി നിരവധി പുസ്തകങ്ങളും എഴുതിയിട്ടുണ്ട്. കൂടുതലും കുട്ടികൾക്കു വേണ്ടിയുള്ളതാണ്. അന്തരാഷ്ട്ര വനിത ദിനത്തിലാണ് 73 കാരിയായ സുധാ മൂർത്തിയെ രാജ്യസഭയിലേക്ക് നാമനിർദ്ദേശം ചെയ്തത്. കന്നഡ, ഇംഗീഷ് സാഹിത്യങ്ങൾ നൽകിയ സംഭാവനകൾക്ക് സാഹിത്യ അക്കാദമി ബാൽ സാഹിത്യ പുരസ്‌കാരം, പത്മശ്രീ, പത്മ ഭൂഷൺ പുരസ്‌കാരങ്ങളും ലഭിച്ചിട്ടുണ്ട്.

ടെൽകോയിൽ ജോലി ചെയ്ത ആദ്യ വനിത എൻജിനീയറാണ് സുധാ മൂർത്തി. ഭർത്താവായ നാരായണ മൂർത്തിക്ക് ഇൻഫോസിസ് തുടങ്ങാൻ 10000 രൂപയുടെ ഫണ്ട് നൽകിയത് സുധയാണ്. ഇപ്പോൾ 80 ബില്യൺ യു.എസ് ഡോളർ വിപണി മൂലധനമുണ്ട് ഇൻഫോസിസിന്. ഇൻഫോസിസ് കമ്പനി സഹസ്ഥാപകൻ എൻ.ആർ. നാരായണ മൂർത്തിയുടെ ഭാര്യയും ഇൻഫോസിസ് ഫൗണ്ടേഷന്റെ മുൻ ചെയർപേഴ്സണുമാണ് സുധ.

കന്നഡ, ഇംഗ്ലീഷ് ഭാഷകളിൽ സുധാ മൂർത്തി എഴുതാറുണ്ട്. ഹൗ ഐ ടോട്ട് മൈ ഗ്രാൻഡ്മദർ ടു റീഡ്, മഹാശ്വേത, ഡോളർ ബഹു തുടങ്ങിയവയാണ് അവരുടെ പ്രധാന രചനകൾ. നിരവധി അനാഥാലയങ്ങൾ സുധ സ്ഥാപിക്കുകയും ഗ്രാമീണ മേഖലയുടെ വികസനത്തിന് ആവശ്യമായ പ്രവർത്തനങ്ങളിൽ ഏർപ്പെടുകയും ചെയ്തിട്ടുണ്ട്. ബ്രിട്ടീഷ് പ്രധാനമന്ത്രി ഋഷി സുനക്കിന്റെ ഭാര്യ അക്ഷത, രോഹൻ മൂർത്തി എന്നിവരാണ് മക്കൾ.