ന്യൂഡൽഹി: ജയിലിനുള്ളിൽനിന്ന് ഭരിക്കാൻ അരവിന്ദ് കെജ്രിവാളിനെ അനുവദിക്കില്ലെന്ന് ഡൽഹി ലഫ്. ഗവർണർ വി. സക്സേന. അറസ്റ്റിലായ ഡൽഹി മുഖ്യമന്ത്രി അരവിന്ദ് കെജ്രിവാൾ ജയിലിൽ നിന്ന് ഡൽഹിയുടെ ഭരണം തുടരുമെന്ന് ആം ആദ്മി പാർട്ടി നേതാക്കൾ ആവർത്തിച്ച പശ്ചാത്തലത്തിലാണ് സക്സേനയുടെ പ്രതികരണം. ഒരു ദേശീയ മാധ്യമം സംഘടിപ്പിച്ച മുഖാമുഖം പരിപാടിയിൽ സംസാരിക്കുമ്പോഴാണ് ലഫ്. ഗവർണർ നിലപാട് വ്യക്തമാക്കിയത്.

'ജയിലിനുള്ളിൽവെച്ച് സർക്കാർ പ്രവർത്തിക്കില്ലെന്ന് ഡൽഹിയിലെ ജനങ്ങൾക്ക് ഉറപ്പുനൽകുകയാണെ'ന്നായിരുന്നു അദ്ദേഹത്തിന്റെ പ്രസ്താവന. ഡൽഹി മദ്യനയക്കേസുമായി ബന്ധപ്പെട്ട് മാർച്ച് 21-നാണ് അരവിന്ദ് കെജ്രിവാളിനെ ഇ.ഡി. അറസ്റ്റ് ചെയ്തത്. കള്ളപ്പണം വെളുപ്പിക്കൽ അടക്കമുള്ള ആരോപണങ്ങളിൽ ചോദ്യംചെയ്യലിനായി മാർച്ച് 28 വരെയാണ് കോടതി കെജ്രിവാളിനെ ഇ.ഡിയുടെ കസ്റ്റഡിയിൽ വിട്ടുകൊണ്ടുള്ള ഉത്തരവ് പുറത്തുവിട്ടത്.

ഇ.ഡിയുടെ കസ്റ്റഡിയിൽ തുടരവേ കെജ്രിവാൾ ജലവിഭവവകുപ്പിലെ നടപടിക്കായി ഞായറാഴ്ച നിർദ്ദേശം നൽകിയിരുന്നു. ഇത് വലിയ വിമർശനങ്ങൾക്ക് വഴിവെച്ചിരുന്നു. അത് കെട്ടടങ്ങുംമുമ്പ് തന്നെ കെജ്രിവാൾ അടുത്ത ഉത്തരവും പുറപ്പെടുവിച്ചു. ഈ സാഹചര്യത്തിലാണ് മുഖ്യമന്ത്രിയെ ജയിലിനുള്ളിൽനിന്ന് ഭരിക്കാൻ അനുവദിക്കില്ലെന്ന് ലഫ്നന്റ് ജനറൽ പറഞ്ഞിരിക്കുന്നത്.