ബംഗളൂരു: ഉത്സവത്തിനിടെ അനേക്കലിൽ കൂറ്റൻ രഥം തകർന്ന് വീണ് അപകടം. 100 അടിയോളം ഉയരമുള്ള രഥമാണ് തകർന്നുവീണത്. ആയിരക്കണക്കിന് ആളുകൾ തടിച്ചുകൂടുന്ന ഉത്സവത്തിന് ഇടയിൽ സംഭവിച്ച അപകടം വലിയ രീതിയിലാണ് പരിഭ്രാന്തി പരത്തിയത്. എന്നാൽ തലനാരിഴയ്ക്ക് വൻ അപകടം ഒഴിവായി.

സംഭവത്തിന്റെ വീഡിയോ ഇപ്പോൾ വലിയ രീതിയിലാണ് പ്രചരിക്കുന്നത്. അപകടത്തെ തുടർന്ന് ആളുകൾ പരിഭ്രാന്തരായി നാലുപാടും ഓടുന്നത് വീഡിയോയിൽ കാണാം. എന്നാൽ അപകടത്തിൽ ആർക്കും കാര്യമായ പരുക്കേറ്റിട്ടില്ല.

അടുത്തുള്ള ഇലക്ട്രിക് പോസ്റ്റിൽ തട്ടാതെ തൊട്ടടുത്തേക്ക് രഥം തകർന്നുവീണത് വലിയൊരു ദുരന്തമാണ് ഒഴിവാക്കിയത്. അനേക്കലിലെ ഹുസ്‌കൂർ മദ്ദൂരമ്മ ക്ഷേത്രോത്സവത്തിന് ഇടയിലാണ് സംഭവം. കാളകളുടെ പുറത്താണ് രഥം കെട്ടി വലിച്ചിരുന്നത്. ഇതാണ് തകർന്നുതാഴെ വീണത്.