ചെന്നൈ: ചെന്നൈയിലെ 'കലാക്ഷേത്രയിൽ' ലൈംഗിക അതിക്രമ പരാതിയിൽ മലയാളി അദ്ധ്യാപകൻ അറസ്റ്റിൽ. അദ്ധ്യാപകൻ ഷീജിത്ത് കൃഷ്ണ (54) ആണ് അറസ്റ്റിൽ ആയത്. 2007ൽ കലാക്ഷേത്രയിൽ പഠിച്ച യുവതിയുടെ പരാതിയിലാണ് നടപടി. വിദേശത്തുള്ള യുവതി ഓൺലൈൻ വഴിയാണ് ഹൈക്കോടതിക്ക് പരാതി നൽകിയത്. കോടതി നിർദേശപ്രകാരം അടയാർ വനിത പൊലീസ് സെൽ ആണ് അന്വേഷണം നടത്തിയത്. തുടർന്ന് കേസെടുത്ത പൊലീസ് അദ്ധ്യാപകനെ പിടികൂടുകയായിരുന്നു.

കഴിഞ്ഞവർഷം ചെന്നൈ കലാക്ഷേത്രയിലെ രുഗ്മിണി ദേവി കോളേജ് ഓഫ് ഫൈൻ ആർട്‌സിലെ മലയാളി അദ്ധ്യാപകനും പീഡന കേസിൽ അറസ്റ്റിലായിരുന്നു. കോളേജിലെ അസിസ്റ്റന്റ് പ്രൊഫസറായ ഹരി പത്മനെയാണ് ചെന്നൈ പൊലീസ് അറസ്റ്റ് ചെയ്തിരുന്നത്. കോളേജിലെ മുൻ വിദ്യാർത്ഥിനി നൽകിയ പരാതിയിലാണ് നടപടി. 2023 ഏപ്രിലിലായിരുന്നു ഈ അറസ്റ്റ്. ഈ സംഭവത്തിനുശേഷമാണിപ്പോൾ വീണ്ടും സമാനമായ പരാതിയിൽ കലാക്ഷേത്രയിലെ മറ്റൊരു അദ്ധ്യാപകൻ കൂടി അറസ്റ്റിലാകുന്നത്.

കഴിഞ്ഞ വർഷം ക്യാമ്പസിലെ നാല് അദ്ധ്യാപകർക്കെതിരെ വിദ്യാർത്ഥികൾ പരാതി ഉന്നയിച്ചിരുന്നു. 90ഓളം വിദ്യാർത്ഥികളാണ് അദ്ധ്യാപകർക്കെതിരെ പരാതിയുമായി വനിതാ കമ്മീഷനെ സമീപിച്ചിരുന്നത്. കുറ്റക്കാരെന്ന് കണ്ടെത്തിയാൽ അദ്ധ്യാപകർക്കെതിരെ കർശനനടപടി സ്വീകരിക്കുമെന്ന് അന്ന് മുഖ്യമന്ത്രി എംകെ സ്റ്റാലിൻ വ്യക്തമാക്കിയിരുന്നു.