ആദ്യ ഭാര്യയുടെ മരണശേഷം രണ്ടാം വിവാഹത്തിന് നീക്കം; പ്രായപൂര്‍ത്തിയാകാത്ത രണ്ട് ആണ്‍കുട്ടികളെ പിതാവ് കൊലപ്പെടുത്തി
പ്രായപൂര്‍ത്തിയാകാത്ത രണ്ട് ആണ്‍കുട്ടികളെ പിതാവ് കൊലപ്പെടുത്തി
നയാഗഡ്: രണ്ടാം വിവാഹത്തെ എതിര്‍ത്ത പ്രായപൂര്‍ത്തിയാകാത്ത രണ്ട് ആണ്‍കുട്ടികളെ പിതാവ് കൊലപ്പെടുത്തി. ഒഡീഷയിലെ നയാഗഡിലെ ഫത്തേഗഡ് പോലീസ് സ്റ്റേഷന്‍ പരിധിയിലുള്ള ധന്‍ചന്‍ഗഡ ഗ്രാമത്തില്‍ രണ്ട് ദിവസങ്ങള്‍ക്ക് മുമ്പാണ് ഹൃദയഭേദകമായ സംഭവം നടന്നത്. 14, 11 വയസ്സ് മാത്രം പ്രായമുള്ള പ്രായപൂര്‍ത്തിയാകാത്ത രണ്ട് ആണ്‍ കുട്ടികളെ കൊലപ്പെടുത്തിയ കേസില്‍ പിതാവ് പ്രകാശ് മൊഹന്തിയെ നയാഗഡ് പൊലീസ് വ്യാഴാഴ്ച അറസ്റ്റ് ചെയ്തു.
പ്രതി തന്റെ രണ്ട് മക്കളെയും ക്രൂരമായി ശ്വാസം മുട്ടിച്ച് കൊലപ്പെടുത്തിയ ശേഷം ആത്മഹത്യയാണെന്ന് വരുത്തിത്തീര്‍ക്കാന്‍ തൂക്കിലേറ്റിയെന്നാണ് റിപ്പോര്‍ട്ടുകള്‍. പൊലീസ് മൃതദേഹങ്ങള്‍ പിടിച്ചെടുത്ത് അസ്വഭാവിക മരണത്തിന് കേസ് രജിസ്റ്റര്‍ ചെയ്തിട്ടുണ്ട്. എന്നാല്‍, ആദ്യ ഭാര്യയുടെ മരണശേഷം പ്രതിശ്രുത വധുവുമായി ബന്ധം പുലര്‍ത്തിയിരുന്ന ഇയാള്‍, രണ്ടാം വിവാഹത്തിന് മുമ്പ് തടസ്സങ്ങളായിരുന്ന തന്റെ രണ്ട് ആണ്‍മക്കളെ ഒഴിവാക്കിയതായാണ് പൊലീസ് അന്വേഷണത്തില്‍ കണ്ടെത്തിയത്. കേസില്‍ അന്വേഷണം പുരോഗമിക്കുകയാണെന്നും കുറ്റകൃത്യത്തില്‍ മകനെ സഹായിച്ചതായി സംശയിക്കപ്പെടുന്ന പ്രതിയുടെ മുത്തശ്ശിയെ നിരീക്ഷിക്കുന്നുണ്ടെന്നും പൊലീസ് പറഞ്ഞു.
