ഹിമാചല്‍ പ്രദേശിലെ ബിലാസ്പൂരില്‍ വീണ്ടും മേഘവിസ്‌ഫോടനം; വാഹനങ്ങള്‍ മണ്ണിനടിയിലായി; കൃഷിയിടങ്ങള്‍ക്ക് നാശനഷ്ടം; ആളപായമില്ല
ഷിംല: ഹിമാചല്‍ പ്രദേശില്‍ വീണ്ടും മേഘവിസ്‌ഫോടനം. ബിലാസ്പൂര്‍ ജില്ലയില്‍ ശനിയാഴ്ച പുലര്‍ച്ചെ ഉണ്ടായ മേഘവിസ്‌ഫോടനത്തില്‍ നിരവധി വാഹനങ്ങള്‍ അവശിഷ്ടങ്ങള്‍ക്കടിയില്‍ കുടുങ്ങി. കൃഷിയിടങ്ങള്‍ക്ക് നാശനഷ്ടമുണ്ടായി. ആളപായമൊന്നും റിപ്പോര്‍ട്ട് ചെയ്തിട്ടില്ലെന്ന് ഉദ്യോഗസ്ഥര്‍ പറഞ്ഞു.
നൈന ദേവി നിയമസഭാ മണ്ഡലത്തിലെ നംഹോള്‍ പ്രദേശത്തെ ഗുത്രഹാന്‍ ഗ്രാമത്തിലാണ് മേഘവിസ്‌ഫോടനം ഉണ്ടായത്. കുത്തിയൊലിച്ച് അവശിഷ്ടങ്ങളോടൊപ്പം ഒഴുകിയെത്തിയ വെള്ളത്തില്‍ കൃഷിയിടങ്ങള്‍ ഒലിച്ചുപോയെന്ന് പ്രദേശവാസികള്‍ പറഞ്ഞു. നിരവധി വാഹനങ്ങള്‍ അവശിഷ്ടങ്ങള്‍ക്കിടയില്‍ കുടുങ്ങി.
അതിനിടെ, ശനിയാഴ്ച രാവിലെ സംസ്ഥാന തലസ്ഥാനമായ ഷിംലയില്‍ മൂടല്‍മഞ്ഞ് വ്യാപിച്ചതോടെ ദൃശ്യപരത ഏതാനും മീറ്ററുകളായി കുറഞ്ഞു. സ്‌കൂള്‍ സമയത്ത് വാഹനങ്ങളില്‍ യാത്ര ചെയ്യുന്നവര്‍ക്ക് അസൗകര്യം നേരിട്ടു. വരും ദിവസങ്ങളില്‍ സംസ്ഥാനത്തിന്റെ ഒറ്റപ്പെട്ട ഭാഗങ്ങളില്‍ കനത്ത മഴ പെയ്യുമെന്ന് പ്രാദേശിക കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി.
സംസ്ഥാന അടിയന്തര പ്രവര്‍ത്തന കേന്ദ്രം പ്രകാരം സമീപകാല വെള്ളപ്പൊക്കവും മണ്ണിടിച്ചിലുകളും കാരണം സംസ്ഥാനത്ത് 953 വൈദ്യുത ട്രാന്‍സ്ഫോര്‍മറുകളും 336 ജലവിതരണ പദ്ധതികളും തടസ്സപ്പെട്ടു.
ജൂണ്‍ 20 ന് സംസ്ഥാനത്ത് കാലവര്‍ഷം ആരംഭിച്ചതിനുശേഷം സെപ്റ്റംബര്‍ 12 വരെ മഴയുമായി ബന്ധപ്പെട്ട അപകടങ്ങളിലും റോഡപകടങ്ങളിലും ആകെ 386 പേര്‍ മരിച്ചു. 386 പേരില്‍ 218 പേര്‍ മഴയുമായി ബന്ധപ്പെട്ട അപകടങ്ങളിലാണ് മരിച്ചത്. 168 പേര്‍ റോഡപകടങ്ങളിലും. ഇതുവരെ സംസ്ഥാനത്തിന് 4,465 കോടി രൂപയുടെ നഷ്ടം സംഭവിച്ചതായി ഉദ്യോഗസ്ഥര്‍ പറഞ്ഞു.
