നാലു വയസുകാരനെ തറയില്‍ തള്ളിയിട്ട് കൊലപ്പെടുത്തി രണ്ടാനമ്മ; കുഞ്ഞിന്റെ അച്ഛന്റെ പരാതിയില്‍ യുവതിയെ അറസ്റ്റ് ചെയ്ത് പോലിസ്
നാലു വയസുകാരനെ തറയില്‍ തള്ളിയിട്ട് കൊലപ്പെടുത്തി രണ്ടാനമ്മ
ഡെറാഡൂണ്‍: നാല് വയസുകാരനായ കുഞ്ഞിനെ രണ്ടാനമ്മ മുകളില്‍ നിന്നും തറയിലേക്ക് തള്ളിയിട്ട് കൊലപ്പെടുത്തി. കുഞ്ഞിന്റെ പിതാവിന്റെ പരാതിയില്‍ രണ്ടാനമ്മയെ പോലിസ് അറസ്റ്റ് ചെയ്തു. ഉത്തരാഖണ്ഡിലെ ഡെറാഡൂണിലാണ് സംഭവം. യുവാവിന്റെ രണ്ടാം ഭാര്യയായ പ്രിയയ്ക്ക് ആദ്യ ഭാര്യയിലുണ്ടായ കുഞ്ഞിനെ ഇഷ്ടമായിരുന്നില്ല. പ്രിയ മകന് വിവാനോട് ക്രൂരമായി പെരുമാറുകയും നിസ്സാരകാര്യങ്ങള്‍ക്ക് മര്‍ദിക്കുകയും ചെയ്യുമായിരുന്നുവെന്ന് കുട്ടിയുടെ പിതാവായ രാഹുല്‍ കുമാര്‍ പരാതിയില്‍ പറഞ്ഞിട്ടുണ്ട്.
ആദ്യ ഭാര്യയുടെ മരണശേഷമാണ് യുവാവ് പ്രിയയെ വിവാഹം കഴിച്ചത്. എന്നാല്‍ വിവാനെ ഇഷ്ടിമില്ലാതിരുന്ന പ്രിയ കുഞ്ഞിനോട് വളരെ ക്രൂരമായാണ് പെരുമാറിയിരുന്നത്. ഒക്ടോബര്‍ 27 ന് രാഹുല്‍ ജോലിക്ക് പോയ ശേഷമാണ് മകന് ഗുരുതരമായി പരിക്കേറ്റത്. കുട്ടിയെ എടുത്ത് ആശുപത്രിയിലേക്ക് കൊണ്ട് പോകും വഴിയെ കുട്ടി മരിക്കുകയായിരുന്നു. രാഹുല്‍ നല്‍കിയ പരാതിയുടെ അടിസ്ഥാനത്തില്‍ ബിഎന്‍എസ് സെക്ഷന്‍ 105 (കുറ്റകരമായ കൊലപാതകം) പ്രകാരം ഡോയിവാല പൊലീസ് കേസ് രജിസ്റ്റര്‍ ചെയ്യുകയും നടപടികള്‍ ആരംഭിക്കുകയും ചെയ്തിട്ടുണ്ട്.
സംഭവവുമായി ബന്ധപ്പെട്ട് അയല്‍ക്കാരില്‍ നിന്ന് വിവരങ്ങള്‍ ശേഖരിച്ചതായും ചോദ്യം ചെയ്യുന്നതിനായി പ്രിയയെ കസ്റ്റഡിയിലെടുത്തതായും പൊലീസ് പറഞ്ഞു. ചോദ്യം ചെയ്യലില്‍, വിവാനെ താന്‍ ദേഷ്യത്തില്‍ തറയില്‍ തള്ളിയിട്ടതായി യുവതി സമ്മതിച്ചതായും പൊലീസ് കൂട്ടിച്ചേര്‍ത്തു.
