ബെംഗളൂരു: വധുവിന്റെയോ വരന്റെയോ ബന്ധുവെന്ന് നടിച്ച് വിവാഹ ചടങ്ങുകളിലെത്തി സ്വര്‍ണം കവര്‍ന്നിരുന്ന മുന്‍ ഗസ്റ്റ് ലക്ചറര്‍ അറസ്റ്റില്‍. കെ.ആര്‍ പുരം ഉദയനഗര്‍ സ്വദേശിനിയായ രേവതിയാണ് (46) അറസ്റ്റിലായത്. ഗസ്റ്റ് ലക്ചററായിരുന്ന ഇവര്‍ ജോലി നിര്‍ത്തി മോഷണത്തിലേക്ക് തിരിയുകയായിരുന്നെന്ന് പോലിസ് പറഞ്ഞു. വിവാഹ സ്ഥലങ്ങളിലെത്തി അടുപ്പം കൂടിയ ശേഷം സ്വര്‍ണാഭരണങ്ങളും പണവും മറ്റ് വിലപിടിപ്പുള്ള വസ്തുക്കളും മോഷ്ടിച്ച് മുങ്ങുന്നതായിരുന്നു ഇവരുടെ രീതി.

വിവിധ കല്യാണമണ്ഡപങ്ങളില്‍ നടന്ന മോഷണങ്ങളില്‍ ഇവര്‍ പ്രതിയാണെന്ന് ബസവനഗുഡി പൊലീസ് പറഞ്ഞു. ഇവരുടെ വീട്ടില്‍ പോലിസ് നടത്തിയ തിരച്ചിലില്‍ ഏകദേശം 32 ലക്ഷം രൂപ വിലമതിക്കുന്ന 262 ഗ്രാം സ്വര്‍ണാഭരണങ്ങള്‍ പൊലീസ് കണ്ടെടുത്തു. നവംബര്‍ 23ന് ബസവനഗുഡിയിലെ കല്യാണമണ്ഡപത്തില്‍ ബന്ധുവിന്റെ വിവാഹത്തിനെത്തിയ മഞ്ജുനാഥ നഗര്‍ സ്വദേശിനിയുടെ പരാതിയെത്തുടര്‍ന്നാണ് പൊലീസ് അന്വേഷണം ആരംഭിച്ചത്. 32 ഗ്രാം തൂക്കമുള്ള സ്വര്‍ണമാല ഇവര്‍ മണ്ഡപത്തിലെ മുറിയില്‍ ബാഗില്‍ സൂക്ഷിച്ചിരുന്നു. മാല മോഷണം പോയതിനെ തുടര്‍ന്ന് പൊലീസിനെ അറിയിക്കുകയായിരുന്നു.

തുടര്‍ന്ന് സിസിടിവി ദൃശ്യങ്ങള്‍ അടക്കമുള്ളവ പരിശോധിച്ച് നടത്തിയ അന്വേഷണമാണ് രേവതിയിലേക്ക് എത്തിയത്. ഡിസംബര്‍ ഒന്നിന് വീട്ടില്‍ നിന്നാണ് രേവതിയെ പൊലീസ് പിടികൂടിയത്. ചോദ്യം ചെയ്യലില്‍ ബസവനഗുഡിയിലെ മറ്റ് രണ്ട് കല്യാണമണ്ഡപങ്ങളിലും മറ്റ് ജില്ലകളിലും സമാനമായ രീതിയില്‍ മോഷണം നടത്തിയതായി ഇവര്‍ സമ്മതിച്ചു. മോഷ്ടിച്ച ആഭരണങ്ങളില്‍ ചിലത് വീട്ടില്‍ സൂക്ഷിക്കുകയും ബാക്കിയുള്ളവ വായ്പയ്ക്കായി ബാങ്കില്‍ പണയപ്പെടുത്തുകയും ചെയ്തിരുന്നു.

ഏതാനും വര്‍ഷങ്ങള്‍ക്ക് മുന്‍പ് ജോലി ഉപേക്ഷിച്ച ശേഷമാണ് ഇവര്‍ മോഷണത്തിലേക്കു തിരിഞ്ഞതെന്നു പൊലീസ് പറയുന്നു. ബന്ധുവാണെന്ന് തോന്നിപ്പിക്കും വിധം പെരുമാറും. സൗഹൃദം സ്ഥാപിച്ച് മുറികളില്‍ കടന്നുകൂടി വിലപിടിപ്പുള്ളവ മോഷ്ടിച്ച് കടന്നുകളയുകയുമാണ് പതിവ്. വിവാഹ ചടങ്ങുകള്‍ക്കിടയില്‍ സ്ത്രീകള്‍ ആഭരണങ്ങള്‍ അഴിച്ചുവയ്ക്കുന്നതും ചടങ്ങുകളില്‍ മുഴുകിയിരിക്കുന്നതും ശ്രദ്ധിച്ചശേഷമാണ് രേവതി മോഷണം നടത്തുന്നത്. ഭര്‍ത്താവ് ഹൃദയസംബന്ധമായ അസുഖത്തിനു ചികിത്സയിലാണെന്നും മകന്റെ വിദ്യാഭ്യാസ ചെലവുകള്‍ക്കും മറ്റ് കുടുംബ ആവശ്യങ്ങള്‍ക്കും പണമില്ലാത്തതിനാലാണ് മോഷണം നടത്തിയതെന്നും ഇവര്‍ പൊലീസിനോട് പറഞ്ഞു.

വിവാഹ വീട്സ്വര്‍ണം മോഷണംമുന്‍ ഗസ്റ്റ് ലക്ചറര്‍അറസ്റ്റ്‌

സ്വന്തം ലേഖകൻ