സ്കൂള് വിദ്യാര്ഥിനിയോട് മോശം പെരുമാറ്റം; അനുവാദമില്ലാതെ കൈപിടിക്കുന്നതും 'ഐ ലവ് യു' പറയുന്നതും സ്ത്രീകളുടെ അന്തസ്സിനെ ഹനിക്കുമെന്ന് ഛത്തീസ്ഗഡ് ഹൈക്കോടതി
റായ്പുര്: അനുവാദമില്ലാതെ സ്ത്രീയുടെ കൈപിടിക്കുന്നതും വലിച്ചടുപ്പിക്കുന്നതും 'ഐ ലവ് യു' എന്ന് പറയുന്നതും സ്ത്രീകളുടെ അന്തസ്സിനെ അപമാനിക്കുന്ന തരത്തിലുള്ള കുറ്റകൃത്യമാണെന്ന് ഛത്തീസ്ഗഡ് ഹൈക്കോടതി. സ്കൂള് വിട്ട് വരുമ്പോള് പരാതിക്കാരിയായ പെണ്കുട്ടിയുടെ കൈ പിടിച്ച് വലിച്ചടുപ്പ് ഐ ലവ് യു പറഞ്ഞതിന് മൂന്ന് വര്ഷം തടവ് ശിക്ഷ വിധിച്ച യുവാവിന്റെ അപ്പീല് പരിഗണിക്കുകയായിരുന്നു കോടതി. ഐ.പി.സിയിലെയും പോക്സോ നിയമത്തിലെയും വിവിധ വകുപ്പുകള് പ്രകാരം 2022ലാണ് യുവാവിന് വിചാരണ കോടതി മൂന്ന് വര്ഷം കഠിന തടവിന് ശിക്ഷ വിധിച്ചത്. സംഭവം നടക്കുമ്പോള് പ്രതിക്ക് 19 വയസ്സായിരുന്നു.
പ്രതിയുടെ പെരുമാറ്റം അങ്ങേയറ്റം പ്രതിഷേധാര്ഹമാണെന്ന് ജസ്റ്റിസ് നരേഷ് കുമാര് ചന്ദ്രവംശി പറഞ്ഞു. ഇത് ഐ.പി.സി സെക്ഷന് 354 പ്രകാരമുള്ള കുറ്റകൃത്യത്തിന്റെ പരിധിയില് വരുമെന്ന് വ്യക്തമാക്കിയ ഹൈക്കോടതി, വിചാരണ കോടതിയുടെ ഉത്തരവ് ശരിവച്ചു. കുറ്റകൃത്യം നടക്കുമ്പോള് പെണ്കുട്ടിക്ക് പ്രായപൂര്ത്തി ആയില്ലെന്ന് തെളിയിക്കാന് കഴിയാത്തതിനാല് പോക്സോ വകുപ്പുകള് ഒഴിവാക്കി. പ്രതിയുടെ അന്നത്തെ പ്രായം പരിഗണിച്ച് ശിക്ഷാ കാലയളവ് ഒരു വര്ഷമായി കുറക്കുന്നുവെന്നും കോടതി അറിയിച്ചു. നിലവില് ജാമ്യത്തിലിറങ്ങിയ പ്രതിയോട് കോടതിയില് കീഴടങ്ങാനും ശിക്ഷ പൂര്ത്തിയാക്കാനും നിര്ദ്ദേശിച്ചു.
