ആരെയും കൂസാതെ 'ബുർജ് ഖലീഫ'യുടെ മുന്നിൽ നിന്ന് നൃത്തം ചെയ്ത് അമ്മ; കൂടെ കട്ട സപ്പോർട്ടായി മകളും; ഏറ്റെടുത്ത് സോഷ്യൽ മീഡിയ

ഡൽഹി: ദുബായിലെ പ്രശസ്തമായ ബുർജ് ഖലീഫയ്ക്ക് മുന്നിൽ പരമ്പരാഗത സാരി ധരിച്ച് നൃത്തം ചെയ്ത അമ്മയുടെ വീഡിയോ സമൂഹ മാധ്യമങ്ങളിൽ വൈറലായി. മകൾ ബിനിത കർക്കി പങ്കുവെച്ച ദൃശ്യങ്ങളാണ് കാഴ്ചക്കാരുടെ മനം കവർന്നത്.

തന്റെ അമ്മയുമായി ബുർജ് ഖലീഫ കാണാനെത്തിയതായിരുന്നു ഇൻസ്റ്റാഗ്രാം ഉപയോക്താവായ ബിനിത കർക്കി. ലോകത്തിലെ ഏറ്റവും ഉയരം കൂടിയ കെട്ടിടത്തിന് മുന്നിൽ സാരി ധരിച്ച് സന്തോഷത്തോടെ നൃത്തം ചെയ്യുന്ന അമ്മയെ വീഡിയോയിൽ കാണാം. ദുബായ് നഗരമധ്യത്തിലെ കെട്ടിടത്തിന് സമീപം ഉലാത്തുന്ന അമ്മയുടെ ദൃശ്യങ്ങൾ ബിനിതയാണ് ചിത്രീകരിച്ചത്. "നിങ്ങളുടെ അമ്മ ലോകത്തിലെ ഏറ്റവും ഉയരം കൂടിയ ടവറിൽ കയറി, നിങ്ങളാണ് അത് സാധ്യമാക്കിയത്" എന്ന ഹൃദയസ്പർശിയായ കുറിപ്പോടെയാണ് ബിനിത ഈ വീഡിയോ പങ്കുവെച്ചത്.

മാതാപിതാക്കളെ തങ്ങളുടെ ജോലിസ്ഥലവും താമസസ്ഥലവും കാണിച്ച് വിദേശരാജ്യങ്ങളിലേക്ക് കൊണ്ടുപോകുന്നത് ഇന്ന് സാധാരണമാണ്. അത്തരം നിമിഷങ്ങൾ പകർത്തുന്ന വീഡിയോകൾക്ക് സമൂഹ മാധ്യമങ്ങളിൽ വലിയ സ്വീകാര്യതയാണ് ലഭിക്കാറുള്ളത്.

828 മീറ്ററിലധികം ഉയരത്തിൽ സ്ഥിതി ചെയ്യുന്ന ബുർജ് ഖലീഫ ലോകത്തിലെ ഏറ്റവും ഉയരം കൂടിയ കെട്ടിടം മാത്രമല്ല, ദുബായിലെ പ്രധാന വിനോദസഞ്ചാര കേന്ദ്രങ്ങളിൽ ഒന്നു കൂടിയാണ്. ലോകമെമ്പാടുമുള്ള സന്ദർശകർ ഈ കെട്ടിടത്തിന്റെ ഭംഗി നേരിൽ കാണാൻ എത്തുന്നു.

നിരവധി പേരാണ് ഈ വീഡിയോയ്ക്ക് താഴെ അഭിപ്രായങ്ങൾ രേഖപ്പെടുത്തിയത്. ഇതൊരു "ഹൃദയസ്പർശിയായ വീഡിയോ" എന്ന് വിശേഷിപ്പിച്ച പലരും, അമ്മയ്ക്ക് മറക്കാനാവാത്ത അനുഭവം നൽകിയതിന് ബിനിതയെ അഭിനന്ദിച്ചു. ഇത്തരം അനുഭവങ്ങൾ മാതാപിതാക്കൾക്ക് എത്രത്തോളം സന്തോഷം നൽകുമെന്ന് പലരും കുറിച്ചു. ഒരു മകളുടെ സ്നേഹവും മാതാപിതാക്കളോടുള്ള കരുതലും ഊട്ടിയുറപ്പിക്കുന്ന ഒരു നേർക്കാഴ്ചയായി ഈ വീഡിയോ മാറി.