'കോക്ക്പിറ്റ് വോയ്സ് റെക്കോര്ഡറും ബ്ലാക്ക് ബോക്സ് വിവരങ്ങളും പരസ്യപ്പെടുത്തണം'; പ്രധാനമന്ത്രിക്ക് കത്തയച്ച് അഹമ്മദാബാദ് എയര് ഇന്ത്യ വിമാന ദുരന്തത്തിലെ ഇരകളുടെ കുടുംബം
അഹമ്മദാബാദ്: അഹമ്മദാബാദ് എയര് ഇന്ത്യ വിമാന ദുരന്തത്തില് ബ്ലാക്ക് ബോക്സ് വിവരങ്ങള് പുറത്തുവിടണമെന്ന് ആവശ്യപ്പെട്ട് പ്രധാനമന്ത്രിക്ക് കത്ത് അയച്ച് ഇരകളുടെ കുടുംബങ്ങള്. വിമാനത്തിന്റെ കോക്ക്പിറ്റ് വോയ്സ് റെക്കോര്ഡറും ബ്ലാക്ക് ബോക്സ് വിവരങ്ങളും പരസ്യപ്പെടുത്തണമെന്നും ആവശ്യം. അപകടമുണ്ടായി 10 മാസം പിന്നിടുമ്പോഴും ദുരന്തത്തിന്റെ യഥാര്ഥ കാരണം അറിയില്ലെന്ന് കത്തില് ചൂണ്ടിക്കാട്ടുന്നു.
കഴിഞ്ഞവര്ഷം ജൂണ് 12നാണ് അഹമ്മദാബാദ് സര്ദാര് വല്ലഭായ് പട്ടേല് വിമാനത്താവളത്തില് നിന്ന് ലണ്ടനിലേയ്ക്ക് പറന്നുയര്ന്ന എയര് ഇന്ത്യയുടെ വിമാനം നിമിഷങ്ങള്ക്കകം വിമാനത്താവളത്തിന് സമീപമുള്ള ജനവാസ കേന്ദ്രത്തില് ഇടിച്ചിറങ്ങിയത്. 12 ജീവനക്കാര് അടക്കം 242 പേരായിരുന്നു വിമാനത്തില് ഉണ്ടായിരുന്നത്. ഇതില് ഒരാള് മാത്രമാണ് രക്ഷപ്പെട്ടത്.
169 ഇന്ത്യക്കാരും 52 ബ്രിട്ടീഷ് പൗരന്മാരും ഏഴ് പോര്ച്ചുഗീസ് പൗരന്മാരും ഒരു കനേഡിയന് പൗരനുമാണ് വിമാനത്തില് ഉണ്ടായിരുന്നത്. അപകടത്തില് വിമാനത്തില് ഉണ്ടായിരുന്ന ഗുജറാത്ത് മുന് മുഖ്യമന്ത്രി വിജയ് രൂപാണി ഉള്പ്പെടെയുള്ള 241 പേരും അപകടത്തില് മരിച്ചിരുന്നു.
