ന്യൂഡൽഹി: ലക്ഷദ്വീപിൽ പെട്രോൾ- ഡീസൽ വിലയിൽ വൻ ഇടിവ്. ലിറ്ററിന് 15.3 രൂപയാണ് കുറച്ചത്. രാജ്യത്തെ ഏക്കാലത്തെയും വിലയിടിവാണ് രേഖപ്പെടുത്തിയിരിക്കുന്നത്. ആന്ത്രോത്ത്, കൽപേനി ദ്വീപുകളിലാണ് പെട്രോൾ, ഡീസൽ വിലയിൽ 15.30 രൂപ ലിറ്ററിന് ഇടിവ് ഉണ്ടായിരിക്കുന്നത്. മാർച്ച് 16 മുതൽ പുതുക്കിയ വില പ്രാബല്യത്തിൽ വന്നു.

വിദൂര ദ്വീപുകളിലേക്ക് ഇന്ധനം കൊണ്ടുപോകുന്നതിനും വിതരണം ചെയ്യുന്നതിനുമായുള്ള അടിസ്ഥാന സൗകര്യങ്ങൾ ഒരുക്കിയ മൂലധനത്തുക ഒഴിവാക്കിയതോടെയാണ് വില കുറഞ്ഞത്. കഴിഞ്ഞ മൂന്ന് വർഷമായി ലിറ്ററിന് 6.09 രൂപയാണ് ഈ ഇനത്തിൽ ഈടാക്കിയിരുന്നത്. മുതൽ മുടക്കിയ തുക പൂർണ്ണമായും പിരിച്ചെടുത്തതോടെയാണ് നടപടി നിർത്തലാക്കിയത്.

കവരത്തി, മിനിക്കോയ് ദ്വീപുകളിൽ 5.20 രൂപ കുറഞ്ഞു. ഇതോടെ കവരത്തി മിനിക്കോയ് ദ്വീപുകളിൽ പെട്രോളിന് 100.75 രൂപയും ആന്ത്രോത്ത്, കൽപേനി ദ്വീപുകളിൽ 100.75 രൂപയുമായി കുറഞ്ഞു. സമാനമായി കവരത്തി, മിനിക്കോയ് ദ്വീപുകളിൽ ഡീസലിന് 95.71 രൂപയായും ആന്ത്രോത്ത്, കൽപേനി ദ്വീപുകളിൽ 95.71 രൂപയുമായും കുറഞ്ഞു.