ഹർ ഘർ തിരംഗ'; എല്ലാവരും ത്രിവർണ പതാക പ്രൊഫൈൽ ചിത്രമാക്കാൻ അഭ്യർത്ഥിച്ച് പ്രധാനമന്ത്രി; മോദിയുടെ സാമൂഹിക മാധ്യമ അക്കൗണ്ടുകളുടെ പ്രൊഫൈൽ ചിത്രം ദേശീയ പതാകയാക്കി

ന്യൂഡൽഹി: സ്വാതന്ത്ര്യദിനാഘോഷം പ്രമാണിച്ച് ത്രിവർണ പതാക സാമൂഹിക മാധ്യമ അക്കൗണ്ടുകളുടെ പ്രൊഫൈൽ ചിത്രമാക്കാൻ അഭ്യർത്ഥിച്ച് പ്രധാനമന്ത്രി നരേന്ദ്ര മോദി. 'ഹർ ഘർ തിരംഗ' ക്യാമ്പയിന്റെ ഭാഗമായാണ് നിർദ്ദേശം. മോദിയുടെ സാമൂഹിക മാധ്യമ അക്കൗണ്ടുകളുടെ പ്രൊഫൈൽ ചിത്രം ദേശീയ പതാകയാക്കി മാറ്റുകയും ചെയ്തു.

ഓഗസ്റ്റ് 13 മുതൽ 15 വരെയുള്ള ദിവസങ്ങളിൽ ഹർ ഘർ തിരംഗയുടെ ഭാഗമാകാൻ രാജ്യത്തെ ജനങ്ങളോട് മോദി വെള്ളിയാഴ്ച അഭ്യർത്ഥിച്ചിരുന്നു. ഇതിന്റെ ഭാഗമായി സാമൂഹിക മാധ്യമങ്ങളുടെ പ്രൊഫൈൽ ചിത്രം മാറ്റാനും നിർദേശിച്ചു. രാജ്യവും ജനങ്ങളും തമ്മിൽ ആഴത്തിലുള്ള ബന്ധം കാത്തുസൂക്ഷിക്കുന്നതിനുവേണ്ടിയാണിതെന്നും മോദി പറഞ്ഞു.

കൂടാതെ ദേശീയപതാകയ്ക്കൊപ്പമുള്ള ഓരോരുത്തരുടെയും ചിത്രം www.harghartiranga.com-ൽ അപ്ലോഡ് ചെയ്യാനും മോദി നിർദേശിച്ചു.