ഏഴാം ക്ലാസുകാരിയെ ബലാത്സംഗത്തിന് ഇരയാക്കിയത് ഏകദേശം ഒരു വര്ഷത്തോളം; പുറത്തുപറഞ്ഞാല് കൊല്ലുമെന്ന ഭീഷണിയും; നാല് അധ്യാപകരും സ്കൂള് ജീവനക്കാരനും പോലീസ് വലയിൽ കുടുങ്ങി
കെന്ദ്രാപാര: ഒഡിഷയിലെ കെന്ദ്രാപാരയിൽ ഏഴാം ക്ലാസ് വിദ്യാർത്ഥിനിയെ ഒരു വർഷത്തോളം ലൈംഗികമായി പീഡിപ്പിച്ച കേസിൽ സ്വകാര്യ സ്കൂളിലെ നാല് അധ്യാപകരെയും ഒരു ജീവനക്കാരനെയും പോലീസ് അറസ്റ്റ് ചെയ്തു. പുറത്തുപറഞ്ഞാൽ കൊല്ലുമെന്ന് ഭീഷണിപ്പെടുത്തിയാണ് പ്രതികൾ കുട്ടിയെ നിരന്തരമായി പീഡനത്തിനിരയാക്കിയത്. കഴിഞ്ഞ മാസമാണ് കുട്ടി ഈ വിവരം മാതാവിനോട് വെളിപ്പെടുത്തിയത്.
തുടർന്ന് മാതാവ് ശിശുക്ഷേമ സമിതിയെ സമീപിക്കുകയും സമിതി പോലീസിൽ വിവരമറിയിക്കുകയുമായിരുന്നു. കുറ്റകൃത്യത്തിൻ്റെ ഗൗരവം കണക്കിലെടുത്ത് ഉന്നത ഉദ്യോഗസ്ഥരെയാണ് അന്വേഷണത്തിന് നിയോഗിച്ചതെന്ന് കെന്ദ്രാപാര എസ്പി സിദ്ധാർഥ് കതാരിയ അറിയിച്ചു. കുട്ടിയുടെ മൊഴി രേഖപ്പെടുത്തിയ ശേഷം കഴിഞ്ഞ ദിവസമാണ് അഞ്ച് പ്രതികളെയും അറസ്റ്റ് ചെയ്തത്.
അതേസമയം, സ്കൂളിലെ അധ്യാപികമാർ ഉൾപ്പെടെ ചിലർ പ്രതികളെ സംരക്ഷിക്കാൻ ശ്രമിച്ചതായി കുട്ടിയുടെ കുടുംബം ആരോപിച്ചു. സ്കൂൾ അധികൃതരോട് ആദ്യം പരാതി പറഞ്ഞിട്ടും നടപടിയുണ്ടായില്ലെന്നും കുടുംബം ചൂണ്ടിക്കാട്ടി. എന്നാൽ, പോലീസ് കേസെടുത്തതിന് ശേഷമാണ് സംഭവത്തെക്കുറിച്ച് അറിഞ്ഞതെന്നാണ് സ്കൂൾ പ്രിൻസിപ്പലിൻ്റെ വിശദീകരണം. വിദ്യാഭ്യാസ സ്ഥാപനത്തിൽ നിന്ന് നേരിട്ട ഈ ക്രൂരത, കുട്ടികളുടെ സുരക്ഷ ഉറപ്പാക്കുന്നതിലെ സ്ഥാപനങ്ങളുടെ ഉത്തരവാദിത്തത്തെക്കുറിച്ചുള്ള ചോദ്യങ്ങൾ ഉയർത്തുന്നതായും അധികൃതർ അറിയിച്ചു.
