ഹാമിർപുർ: ഉത്തർപ്രദേശിൽ 16 വയസ്സുകാരിയെ ബലാത്സംഗം ചെയ്യുകയും അതിന്റെ ദൃശ്യങ്ങൾ പകർത്തി ഭീഷണിപ്പെടുത്തുകയും ചെയ്ത കേസിൽ സർക്കാർ ജീവനക്കാരൻ അറസ്റ്റിൽ. ഹാമിർപുർ ജില്ലയിലെ നായിക്പുർവ ഇച്ചൗലി ജൽ സൻസ്ഥാനിലെ (ജലവിഭവ വകുപ്പ്) നാലാം ഗ്രേഡ് ജീവനക്കാരനായ അബ്ദുൾ സലാം എന്ന ആരിഫാണ് പിടിയിലായത്. ഇയാൾക്കെതിരെ പോക്സോ, ബലാത്സംഗം, ഐ.ടി. നിയമപ്രകാരമുള്ള വകുപ്പുകൾ ചുമത്തി കേസെടുത്തിട്ടുണ്ട്.

വകുപ്പിലെ സഹപ്രവർത്തകയുടെ മകളായ പെൺകുട്ടിയെ പ്രലോഭിപ്പിച്ച് ആരിഫ് നിരവധി തവണ ലൈംഗികമായി പീഡിപ്പിക്കുകയായിരുന്നുവെന്ന് പോലീസ് അറിയിച്ചു. ഈ ദൃശ്യങ്ങളും ചിത്രങ്ങളും ഉപയോഗിച്ച് പെൺകുട്ടിയെ ഭീഷണിപ്പെടുത്തുകയും തുടർന്നും ലൈംഗിക ചൂഷണത്തിന് നിർബന്ധിക്കുകയും ചെയ്തതായി അന്വേഷണ ഉദ്യോഗസ്ഥർ വ്യക്തമാക്കി. ഒടുവിൽ പെൺകുട്ടി അമ്മയെ വിവരമറിയിച്ചതിനെത്തുടർന്ന് അമ്മ സദർ കോട്വാലി പോലീസ് സ്റ്റേഷനിൽ പരാതി നൽകുകയായിരുന്നു.

പരാതിയുടെ അടിസ്ഥാനത്തിൽ അറസ്റ്റിലായ ആരിഫിനെ കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ റിമാൻഡ് ചെയ്തു. ഇരയായ പെൺകുട്ടിയുടെ വൈദ്യപരിശോധന പൂർത്തിയാക്കുകയും കോടതിയിൽ മൊഴി രേഖപ്പെടുത്തുകയും ചെയ്തിട്ടുണ്ടെന്ന് ക്രൈം ഇൻസ്‌പെക്ടർ ഡി.കെ. മിശ്ര അറിയിച്ചു. സംഭവത്തിൽ കൂടുതൽ അന്വേഷണം നടന്നുവരികയാണ്. അറസ്റ്റിനു പിന്നാലെ പ്രതിക്കെതിരെ വകുപ്പ് തല നടപടികളും ആരംഭിച്ചു.

ചിത്രകൂട് ധാം ഡിവിഷന്റെ ജനറൽ മാനേജർ ആരിഫിനെ സസ്പെൻഡ് ചെയ്യുകയും തുടർനടപടികൾക്ക് ഉത്തരവിടുകയും ചെയ്തിട്ടുണ്ട്. ആരിഫ് ഒരു സ്ഥിരം ശല്യക്കാരനാണെന്നും വകുപ്പ് ഉദ്യോഗസ്ഥരോടും ജീവനക്കാരോടും മോശമായി പെരുമാറുകയും അധിക്ഷേപകരമായ ഭാഷ ഉപയോഗിക്കുകയും ചെയ്യാറുണ്ടായിരുന്നെന്നും റിപ്പോർട്ടുകൾ സൂചിപ്പിക്കുന്നു. മുതിർന്ന ഉദ്യോഗസ്ഥർക്ക് ഭീഷണി മുഴക്കുകയും പ്രശ്നങ്ങൾ സൃഷ്ടിക്കുകയും ചെയ്ത ഇയാൾക്കെതിരെ നടപടിയെടുക്കണമെന്ന് ആവശ്യപ്പെട്ട് മുമ്പും കത്തുകൾ അയച്ചിട്ടുണ്ടെന്ന് വകുപ്പ് വൃത്തങ്ങൾ അറിയിച്ചു.

ഉത്തർപ്രദേശ്പീഡനംസർക്കാർ ഉദ്യോഗസ്ഥൻ അറസ്റ്റിൽ

സ്വന്തം ലേഖകൻ