ഉയർന്ന വരുമാനമുണ്ടായിട്ടും..ഇത്തരം കാര്യങ്ങൾ ചെയ്യുന്നതിനോട് എനിക്ക് എതിർപ്പാണ്; അതിന് വേണ്ടത്ര ആത്മവിശ്വാസമോ..കഴിവും ഇല്ല..!!; എയർപോർട്ടിലെത്തിയ യുവാവിന്റെ പോസ്റ്റ് വൈറൽ
ബെംഗളൂരു: പ്രതിവർഷം 50 ലക്ഷം രൂപയിലധികം ശമ്പളം (CTC) ഉണ്ടായിട്ടും, വിമാനത്താവളങ്ങളിലെ ആഢംബര ബ്രാൻഡുകളുടെ കടകളിൽനിന്ന് സാധനങ്ങൾ വാങ്ങാൻ വേണ്ടത്ര ആത്മവിശ്വാസമോ സാമ്പത്തിക ശേഷിയോ തനിക്കു തോന്നുന്നില്ലെന്ന് ഒരു യുവാവ് സമൂഹ മാധ്യമത്തിൽ കുറിച്ചത് വലിയ ചർച്ചകൾക്ക് വഴിയൊരുക്കിയിരിക്കുകയാണ്.
ബെംഗളൂരുവിലെ കെംപഗൗഡ അന്താരാഷ്ട്ര വിമാനത്താവളത്തിലെ സ്വാറോവ്സ്കി, ഡിയോർ, ദി വൈറ്റ് ക്രോ തുടങ്ങിയ പ്രീമിയം സ്റ്റോറുകളുടെ ചിത്രങ്ങൾ പങ്കുവെച്ചുകൊണ്ടാണ് ഇദ്ദേഹം തന്റെ അനുഭവം തുറന്നുപറഞ്ഞത്. ഉയർന്ന വരുമാനമുണ്ടായിട്ടും, ഇത്തരം കടകളിൽ ചെലവഴിക്കുന്നതിനെ ഒരു 'മാനസിക തടസ്സമായി' (psychological barrier) അനുഭവപ്പെടുന്നതായാണ് യുവാവ് വ്യക്തമാക്കിയത്.
ഈ തുറന്നുപറച്ചിലിനോട് സമൂഹ മാധ്യമങ്ങളിൽ സമ്മിശ്ര പ്രതികരണമാണ് ഉയർന്നുവന്നത്. പലരും തങ്ങളുടെ സമാന അനുഭവങ്ങൾ പങ്കുവെച്ചു. ₹50 ലക്ഷം വാർഷിക വരുമാനം ഉണ്ടെങ്കിലും നികുതികൾ, ജീവിതച്ചെലവ്, സമ്പാദ്യം, മറ്റ് ബാധ്യതകൾ എന്നിവ കണക്കിലെടുക്കുമ്പോൾ കാര്യമായി ചെലവഴിക്കാനുള്ള വരുമാനം എല്ലാവർക്കും ഉണ്ടാകണമെന്നില്ലെന്ന് ചിലർ ചൂണ്ടിക്കാട്ടി.
വിമാനത്താവളങ്ങളിലെ ഇത്തരം ആഢംബര സ്റ്റോറുകൾ പ്രധാനമായും പാരമ്പര്യമായി ധനികരായവർ, വിദേശികൾ, അല്ലെങ്കിൽ പ്രതിമാസ വരുമാനത്തെക്കുറിച്ച് ആശങ്കയില്ലാത്തത്ര പണമുള്ളവർ എന്നിങ്ങനെ ഒരു പ്രത്യേക വിഭാഗം ഉപഭോക്താക്കളെ ലക്ഷ്യമിട്ടുള്ളതാണെന്നും, 'സാധാരണ ഇന്ത്യൻ ഉപഭോക്താക്കളെ' ഉദ്ദേശിച്ചുള്ളതല്ലെന്നും പലരും അഭിപ്രായപ്പെട്ടു. വരുമാനത്തെ സമ്പത്തായി തെറ്റിദ്ധരിക്കരുതെന്നും, ഇത്തരം കടകൾ സമ്പന്നർക്കുള്ളതാണെന്നും ചിലർ ഓർമ്മിപ്പിച്ചു.
