മദ്യലഹരിയിൽ പോലീസുകാരൻ ഓടിച്ച വാഹനം ഇ-റിക്ഷയിലിടിച്ചു; തെറിച്ചു വീണ 24കാരിയുടെ ശരീരത്തിലൂടെ എസ്ഐ വണ്ടി ഓടിച്ചു കയറ്റി; ഡ്രൈവറെ കയ്യോടെ പിടികൂടി ജനക്കൂട്ടം; യുവതിയുടെ മരണത്തിൽ പ്രതിഷേധം

അംബാല: ഹരിയാനയിലെ അംബാലയിൽ മദ്യപിച്ച പോലീസുകാരൻ ഓടിച്ച വാഹനം ഇ-റിക്ഷയിൽ ഇടിച്ചുണ്ടായ അപകടത്തിൽ 24 വയസ്സുകാരി കൊല്ലപ്പെട്ടു. അംബാലയിലെ കാളി പൽത്താൻ പാലത്തിന് സമീപമാണ് അപകടം നടന്നത്. നികിത എന്ന യുവതിയാണ് മരിച്ചത്. ഇടിയുടെ ആഘാതത്തിൽ താൻ സഞ്ചരിച്ചിരുന്ന ഇ-റിക്ഷയിൽ നിന്ന് തെറിച്ചുവീണ യുവതിയുടെ ശരീരത്തിലൂടെ പോലീസുകാരന്റെ വാഹനം കയറിയിറങ്ങുകയായിരുന്നു.

അപകടത്തിന് പിന്നാലെ നാട്ടുകാർ ഡ്രൈവറെ തടഞ്ഞുവെക്കുകയും പോലീസിന് കൈമാറുകയും ചെയ്തു. സംഭവത്തെത്തുടർന്ന് അംബാല സിവിൽ ആശുപത്രിയിൽ വൻ പ്രതിഷേധമാണ് നടന്നത്. കുറ്റക്കാരനായ പോലീസുകാരനെതിരെ കർശന നടപടി വേണമെന്ന് ആവശ്യപ്പെട്ട് യുവതിയുടെ കുടുംബം രംഗത്തെത്തിയിട്ടുണ്ട്. ബുധനാഴ്ച വൈകുന്നേരം ഡൽഹിയിൽ നിന്ന് അംബാലയിലെ തന്റെ വീട്ടിലേക്ക് മടങ്ങുകയായിരുന്നു നികിത. യാത്രാമധ്യേ ഒരു പോലീസുകാരൻ ഓടിച്ച വാഹനം നികിത സഞ്ചരിച്ചിരുന്ന ഇ-റിക്ഷയിൽ ഇടിച്ചു.

ഇടിയുടെ ആഘാതത്തിൽ വാഹനത്തിൽ നിന്ന് തെറിച്ചുവീണ നികിതയുടെ ശരീരത്തിലൂടെ പോലീസുകാരൻ വാഹനം ഓടിച്ചു കയറ്റുകയായിരുന്നു. യുവതി സംഭവസ്ഥലത്ത് വെച്ച് തന്നെ മരിച്ചു. "നാല് യാത്രക്കാരുമായി അംബാല കാന്റിൽ നിന്ന് വരികയായിരുന്നു ഞാൻ. അമിതവേഗതയിൽ വന്ന പോലീസുകാരന്റെ കാർ എന്റെ ഇ-റിക്ഷയിൽ ഇടിച്ചു. ഇതോടെ യാത്രക്കാരിലൊരാളായ യുവതി പുറത്തേക്ക് തെറിച്ചുവീണു," ഇ-റിക്ഷാ ഡ്രൈവർ രവീന്ദർ സിംഗ് പറഞ്ഞു. "അതിന് പിന്നാലെ പോലീസുകാരൻ ആ പെൺകുട്ടിയുടെ മുകളിലൂടെ വണ്ടി ഓടിച്ചു കയറ്റി. ആശുപത്രിയിൽ എത്തിച്ചപ്പോഴേക്കും മരണം സംഭവിച്ചതായി ഡോക്ടർമാർ സ്ഥിരീകരിച്ചു," അദ്ദേഹം കൂട്ടിച്ചേർത്തു.

പോലീസുകാരൻ മദ്യപിച്ചിരുന്നതായി ഇ-റിക്ഷാ ഡ്രൈവർ രവീന്ദർ സിംഗ് ആരോപിച്ചു. നാട്ടുകാരിൽ നിന്ന് ലഭിച്ച വിവരത്തിന്റെ അടിസ്ഥാനത്തിൽ നികിതയുടെ സഹോദരൻ മായങ്കും ഇതേ ആരോപണം ഉന്നയിച്ചു. "എന്റെ ചേച്ചി ഡൽഹിയിൽ നിന്ന് വരികയായിരുന്നു. നികിത എന്നാണ് പേര്, ഗുരുഗ്രാമിലാണ് ജോലി ചെയ്യുന്നത്... മദ്യപിച്ച ഒരു പോലീസുകാരനാണ് കാർ ഓടിച്ചിരുന്നത്, ആ വണ്ടി എന്റെ ചേച്ചിയുടെ ദേഹത്തിലൂടെ കയറിയിറങ്ങി," അദ്ദേഹം പറഞ്ഞു. അംബാലയിലെ കാളി പൽത്താൻ പാലത്തിന് സമീപമാണ് അപകടം നടന്നത്. അപകടത്തിന് പിന്നാലെ നാട്ടുകാർ ഡ്രൈവറെ പിടികൂടി പോലീസിൽ ഏൽപ്പിക്കുകയായിരുന്നു.

സംഭവത്തെക്കുറിച്ച് സ്റ്റേഷൻ ഹൗസ് ഓഫീസർ (എസ്.എച്ച്.ഒ) ധരംവീർ പറയുന്നത് ഇങ്ങനെ: ബൽദേവ് നഗർ ഔട്ട്‌പോസ്റ്റിലെ 13-ാം നമ്പർ റൈഡറായി സേവനമനുഷ്ഠിക്കുകയായിരുന്നു പോലീസ് സബ് ഇൻസ്പെക്ടർ (പി.എസ്.ഐ) അമിത്. "മദ്യപിച്ച നിലയിലായിരുന്ന പോലീസുകാരന് വാഹനത്തിന്റെ നിയന്ത്രണം നഷ്ടപ്പെടുകയും നികിതയുടെ ദേഹത്തിലൂടെ വണ്ടി ഓടിച്ചു കയറ്റുകയുമായിരുന്നു. തുടർന്ന് വാഹനം ഹൈവേയിലെ ഗ്രില്ലിൽ ഇടിച്ചു നിന്നു. ഡ്രൈവറെ പോലീസ് അറസ്റ്റ് ചെയ്യുകയും കേസ് രജിസ്റ്റർ ചെയ്യുകയും ചെയ്തിട്ടുണ്ട്," അദ്ദേഹം പറഞ്ഞു. സംഭവത്തിൽ അന്വേഷണം പുരോഗമിക്കുകയാണ്.