മാവോയിസ്റ്റുകളെ വധിച്ച ആ ധീരജവാന്മാർക്ക് നാടിന്റെ ആദരം; നൃത്തം ചെയ്തും മധുരം നൽകിയും വൻ വരവേൽപ്പ്; ആരതി ഉഴിഞ്ഞ് നെറ്റിയിൽ തിലകം ചാർത്തി പ്രദേശവാസികൾ; 'ഭാരത് മാതാ കീ ജയ്' വിളിച്ച് സൈനികർ!
റായ്പൂർ: കഴിഞ്ഞ ദിവസമാണ് ഛത്തീസ്ഗഢിൽ നമ്മുടെ സൈനികർ 27 മാവോയിസ്റ്റുകളെ വധിച്ചത്. ഇപ്പോഴിതാ, വിജയക്കൊടി പാറിച്ചു വന്ന നമ്മുടെ ധീരജവാന്മാർക്ക് ആരതി ഉഴിഞ്ഞ് ആദരവ് നൽകി നാട്ടുകാർ. നാരായൺപൂർ ജില്ലാ ആസ്ഥാനത്ത് ജനങ്ങൾ ഗംഭീര സ്വീകരണമാണ് ഇവർക്ക് നൽകിയത് . ജവാന്മാരെ തിലകം ചാർത്തിയാണ് പ്രദേശവാസികൾ സ്വാഗതം ചെയ്തത്. ദൃശ്യങ്ങൾ സമൂഹ മാധ്യമങ്ങളിൽ ഇതിനോടകം വൈറലായി കഴിഞ്ഞു.
27 ഭീകരരായ നക്സലുകളെ വധിച്ചു ജവാൻമാർ ചരിത്രപരമായ വിജയമാണ് നേടിയത്. തലയ്‌ക്ക് 13.5 കോടിയോളം പാരിതോഷികം പ്രഖ്യാപിച്ച മാവോയിസ്റ്റുകളെയാണ് സുരക്ഷാസേന വധിച്ചത് . അബുജ്മദ് പോലുള്ള പ്രദേശങ്ങളിലെ നക്സലിസത്തിന്റെ വേരുകൾ വേരോടെ തന്നെ പിഴുതെറിയുകയും ചെയ്തു.
പ്രദേശത്ത് ശക്തമായ മഴ ഉണ്ടായിട്ടും അതൊന്നും വക വയ്‌ക്കാതെയായിരുന്നു നാട്ടുകാർ വിജയാഘോഷം നടത്തിയത്. പ്രദേശവാസികളോടൊപ്പം ജവാന്മാരും നൃത്തം ചെയ്തു. മധുരം വിതരണം ചെയ്താണ് നാട്ടുകാർ ജവാന്മാർക്ക് അഭിവാദ്യം അർപ്പിച്ചത്. രാത്രി മുഴുവൻ നൃത്തം ചെയ്തും പാട്ടുപാടിയും ഡിആർജി സൈനികർ തങ്ങളുടെ വിജയം ആഘോഷിച്ചു. ഇതോടെ ആവേശത്തിലായ സൈനികർ റോഡിലിറങ്ങി ഭാരത് മാതാ കീ ജയ് വിളിക്കുകയും ചെയ്തു.
