കൊൽക്കത്ത: മുൻ ഇന്ത്യൻ ക്രിക്കറ്റ് ടീം നായകൻ സൗരവ് ഗാംഗുലിയുടെ ഭാര്യയും പ്രശസ്ത ഒഡീസി നർത്തകിയുമായ ഡോണ ഗാംഗുലിക്ക് നേരെ സാമൂഹിക മാധ്യമങ്ങളിൽ വ്യാപകമായ സൈബർ ആക്രമണം. കൊൽക്കത്ത ഫിലിം ഫെസ്റ്റിവലിൽ ഡോണ ഗാംഗുലി നടത്തിയ നൃത്ത പ്രകടനവുമായി ബന്ധപ്പെട്ട് ഫെയ്‌സ്ബുക്ക് പേജിൽ അധിക്ഷേപകരവും അപകീർത്തികരവുമായ നിരവധി പോസ്റ്റുകൾ പ്രത്യക്ഷപ്പെട്ടത്. സംഭവത്തിൽ ഡോണ ഗാംഗുലി ഠാക്കൂർപുക്കൂർ പോലീസ് സ്റ്റേഷനിൽ ഔദ്യോഗികമായി പരാതി നൽകിയിട്ടുണ്ട്. പരാതിയുടെ അടിസ്ഥാനത്തിൽ പോലീസ് അന്വേഷണം ആരംഭിക്കുകയും കുറ്റവാളികളെ കണ്ടെത്താനുള്ള ശ്രമങ്ങൾ ഊർജ്ജിതമാക്കുകയും ചെയ്തു.

കഴിഞ്ഞ ബുധനാഴ്ചയാണ് ഡോണ ഗാംഗുലി പോലീസിനെ സമീപിച്ചത്. ഫെയ്‌സ്ബുക്കിലെ ചില പേജുകളിൽ തന്റെ നൃത്തത്തെയും വ്യക്തിത്വത്തെയും അവഹേളിക്കുന്ന തരത്തിലുള്ള പോസ്റ്റുകൾ പ്രചരിക്കുന്നതായി അവർ പരാതിയിൽ ചൂണ്ടിക്കാട്ടി. ഈ പോസ്റ്റുകളിൽ തനിക്ക് നേരെ ശരീരാധിക്ഷേപം നടത്തിയെന്നും ഒരു കലാകാരി എന്ന നിലയിലും വ്യക്തി എന്ന നിലയിലുമുള്ള തന്റെ സൽപേരിന് കളങ്കം വരുത്തിയെന്നും പരാതിയിൽ വ്യക്തമാക്കുന്നു. ഈ അപകീർത്തികരമായ പോസ്റ്റുകളുടെയെല്ലാം സ്ക്രീൻഷോട്ടുകൾ തെളിവായി ഡോണ പോലീസിന് കൈമാറിയിട്ടുണ്ട്.

അധിക്ഷേപകരമായ പോസ്റ്റുകൾക്ക് പിന്നിൽ പ്രവർത്തിച്ച വ്യക്തികളെ തിരിച്ചറിയാനുള്ള തീവ്ര ശ്രമത്തിലാണ് പോലീസ്. സാമൂഹിക മാധ്യമങ്ങളിലെ ഈ പോസ്റ്റുകൾ എവിടെ നിന്നാണ് വന്നതെന്നും അതുമായി ബന്ധപ്പെട്ട മൊബൈൽ നമ്പറുകൾ ഏതൊക്കെയാണെന്നും പോലീസ് വിശദമായി പരിശോധിച്ചുവരികയാണ്. സൈബർ കുറ്റകൃത്യങ്ങൾ തടയുന്നതിനും കുറ്റവാളികളെ നിയമത്തിന് മുന്നിൽ കൊണ്ടുവരുന്നതിനും മുൻഗണന നൽകുമെന്നും പോലീസ് വൃത്തങ്ങൾ അറിയിച്ചു.

സൗരവ് ഗാംഗുലിഡോണ ഗാംഗുലിസൈബർ ആക്രമണം

സ്വന്തം ലേഖകൻ