കബഡി മത്സരത്തിൽ ജയിച്ചതിൽ വിരോധം; സ്‌കൂളിലേക്ക് പോകും വഴി ആക്രമണം; വിദ്യാർത്ഥിയെ വെട്ടിപ്പരിക്കേൽപിച്ചു; ആദ്യ വീശലിൽ തന്നെ വിരലുകൾ അറ്റുപോയി; ഗുരുതര പരിക്ക്

ചെന്നൈ: കബഡി മത്സരത്തിൽ ജയിച്ചതിന്റെ വിരോധത്തിൽ ദളിത്‌ വിദ്യാർത്ഥിയെ വെട്ടിപ്പരിക്കേൽപിച്ച് മുതിർന്ന ജാതിക്കാർ. തമിഴ്നാട് തൂത്തുക്കുടിയിലാണ് സംഭവം നടന്നത്. പ്ലസ് വൺ ക്ലാസ് വിദ്യാർത്ഥി ദേവേന്ദ്ര രാജയെ ആണ്‌ പ്രബലജാതിക്കാർ ആയ മൂന്ന് യുവാക്കൾ സ്‌കൂളിലേക്ക് പോകും വഴി ആക്രമിച്ചത്.

ബസിൽ നിന്ന് വിളിച്ചിറക്കിയാണ് ദേവേന്ദ്ര രാജയെ വെട്ടിയത്. ആക്രമണത്തിൽ ദേവേന്ദ്രന്റെ വിരലുകൾ അറ്റുപോയിട്ടുണ്ട്. ഗുരുതരമായി പരിക്കെറ്റ വിദ്യാർത്ഥിയെ തിരുനെൽവേലി മെഡിക്കൽ കോളേജ് ഐസിയുവിൽ ഇപ്പോൾ പ്രവേശിപ്പിച്ചിരിക്കുകയാണ്. ആക്രമണത്തിലെ മുഖ്യപ്രതി ലക്ഷ്മണൻ (19) പിടിയിലായതായി പോലീസ് വ്യക്തമാക്കി. സംഭവത്തിൽ കൂടുതൽ അന്വേഷണം നടന്നുവരുന്നു.