അഹമ്മദാബാദ്: സ്കൂളിൽ വെച്ച് നടന്ന തർക്കത്തിനിടെ എട്ടാം ക്ലാസിലെ വിദ്യാർത്ഥിയുടെ കുത്തേറ്റ് പത്താം ക്ലാസുകാരനായ വിദ്യാർത്ഥി മരിച്ചു. സംഭവത്തെത്തുടർന്ന് രോഷാകുലരായ രക്ഷിതാക്കളും പ്രദേശവാസികളും സ്കൂളിന് മുന്നിൽ പ്രതിഷേധിച്ചു. അഹമ്മദാബാദിലെ ഖോക്രയിലുള്ള സെവൻത് ഡേ അഡ്‌വെന്റിസ്റ്റ് ഹയർ സെക്കൻഡറി സ്കൂളിന് പുറത്താണ് ഈ ദാരുണമായ സംഭവം നടന്നത്.

ചൊവ്വാഴ്ച വൈകുന്നേരം സ്കൂൾ വിട്ട് വീട്ടിലേക്ക് പോവുകയായിരുന്ന പത്താം ക്ലാസ് വിദ്യാർത്ഥി നയനെ, എട്ടാം ക്ലാസിലെ വിദ്യാർത്ഥിയും കൂട്ടാളികളും ചേർന്ന് വളയുകയായിരുന്നു. വാക്കേറ്റത്തിൽ കലാശിച്ച തർക്കം പിന്നീട് കയ്യാങ്കളിയിലേക്ക് നീങ്ങുകയും, ഇതിനിടയിൽ എട്ടാം ക്ലാസിലെ വിദ്യാർത്ഥി കത്തികൊണ്ട് നയനെ വയറ്റിൽ കുത്തുകയുമായിരുന്നു. കുത്തിയ ശേഷം പ്രതി ഓടി രക്ഷപ്പെട്ടു.

വയറ്റിൽ കുത്തേറ്റ നയൻ വേദനയോടെ സ്കൂളിലേക്ക് തിരികെ ഓടുന്നതിൻ്റെ ദൃശ്യങ്ങൾ സിസിടിവി ക്യാമറകളിൽ പതിഞ്ഞിട്ടുണ്ട്. ഉടൻ തന്നെ മണിനഗറിലെ സ്വകാര്യ ആശുപത്രിയിൽ എത്തിച്ചെങ്കിലും ഗുരുതരമായ പരിക്കേറ്റ് നയൻ മരണപ്പെടുകയായിരുന്നു. സംഭവസ്ഥലത്തുനിന്നും രക്ഷപ്പെടാൻ ശ്രമിച്ച പ്രതിയെ സുരക്ഷാ ജീവനക്കാർ തിരിച്ചറിഞ്ഞതിനെ തുടർന്ന് സ്കൂൾ അധികൃതരെയും പോലീസിനെയും വിവരമറിയിക്കുകയായിരുന്നു.

കൊലപാതകശ്രമത്തിന് കേസെടുത്ത പോലീസ്, പ്രായപൂർത്തിയാകാത്ത പ്രതിയെ ജുവനൈൽ ആക്ട് പ്രകാരം അറസ്റ്റ് ചെയ്തു. സംഭവത്തിൻ്റെ സിസിടിവി ദൃശ്യങ്ങൾ പോലീസ് ശേഖരിക്കുകയും, സംഭവസമയം സ്ഥലത്തുണ്ടായിരുന്ന മറ്റ് വിദ്യാർത്ഥികളിൽ നിന്ന് മൊഴിയെടുക്കുകയും ചെയ്തു. നയൻ്റെ മരണത്തെത്തുടർന്ന് രോഷാകുലരായ രക്ഷിതാക്കളും എ.ബി.വി.പി പ്രവർത്തകരും സ്കൂളിന് മുന്നിൽ തടിച്ചുകൂടി പ്രതിഷേധിച്ചു. പ്രതിഷേധക്കാർ സ്കൂളിനും ജീവനക്കാർക്കും നേരെ ആക്രമണവും അഴിച്ചുവിട്ടു.

സംഭവത്തിൽ ഗുജറാത്ത് വിദ്യാഭ്യാസ മന്ത്രി പ്രഫുൽഭായ് പൻസെരിയ അനുശോചനം രേഖപ്പെടുത്തുകയും, രക്ഷിതാക്കളോട് സമാധാനം പാലിക്കാൻ അഭ്യർത്ഥിക്കുകയും ചെയ്തു. സംഭവത്തിൽ നീതി ഉറപ്പാക്കുമെന്ന് അദ്ദേഹം ഉറപ്പുനൽകി.

വിദ്യാർത്ഥിദാരുണാന്ത്യം

സ്വന്തം ലേഖകൻ